fbpx

Vazhdon hetimi për vrasjen e trefishtë në Deçan

Autoritetet në Kosovë thonë se kanë dy apo tri pista që po hetohen lidhur me vrasjen e trefishtë që ndodhi dje  në Gllogjan të Deçanit, trasmeton REL.

Drejtori i Përgjithshëm i Policisë së Kosovës, Sabedin Mehmeti, gjatë një prononcimi për media nga Deçani, tha se ende nuk kanë një motiv lidhur me sulmin me armë zjarri ndaj një autobusi, me ç’rast u vranë shoferi dhe dy nxënës. Ndërkaq, edhe një nxënës mbeti i plagosur.

“Aktualisht mund të flasim për një sistem të dy, përkatësisht tri pistave të mundshme të hetimit dhe të gjitha informacionet që jemi duke i mbledhur, por edhe provat materiale nga vendi i ngjarjes çojnë në këtë drejtim. Po flasim për një person, por me mundësi të ndërlidhjes edhe me persona të tjerë, që nënkupton se mund të ketë më shumë se një të dyshuar. Në kuptimin e qarkullimit të personit, janë duke u ekzaminuar prova teknike të ndryshme, të cilat do të na tregojnë saktë se prej nga ka ardhur, ku ka qëndruar dhe nga ka shkuar.” tha Mehmeti.

Ai tha se momentalisht hetuesit janë duke e kontrolluar terrenin, ndërkaq janë angazhuar edhe njësi shtesë dhe ekspertë për të përpunuar të gjitha informacionet lidhur me këtë ngjarje.

Ndërkaq, sa i përket mundësisë që ky rast të ketë lidhje me akt terrorist, Mehmeti tha se “deri në këto momente që ne po flasim, ne nuk e kemi asnjë të dhënë, asnjë provë, asnjë informacion që shkon nga akti terrorist apo nga akti që ndërlidhet me çështje religjioze”.

Ministri i Punëve të Brendshme, Xhelal Sveçla i bëri ultimatum dorasit që të dorëzohet dhe ftoi qytetarët, që kanë informacione, t’iu drejtohen organeve të rendit.

“Unë i bëj ultimatum vrasësit që të dorëzohet sepse për çdo ditë ai rëndon të tjerët. E dimë shumë mirë që kushdo që ndihmon vrasësit implikohet në vepër të rëndë penale.” tha Sveçla.

Ai shtoi se institucionet janë të vendosura që ky rast të zbardhet sa më shpejt dhe tha se për këtë do të përdoren të gjitha kapacitetet shtetërore.

Nxënësi i plagosur, në gjendje stabile

Nga të shtënat me armë zjarri drejt një autobusi që po udhëtonte nga Gjakova në Deçan, një nxënës u plagos, por gjendja e tij është stabile.

Naim Sahiti, zëdhënës i Spitalit të Pejës ka konfirmuar se i plagosuri është operuar dhe tani është jashtë rrezikut për jetë.

“I është hequr plumbi gjatë orëve të mbrëmjes (më 26 nëntor). Tash është gjatë procesit të trajtimit pas-operativ, por gjendja e tij është shumë e mirë”, tha Sahiti.

Sipas Sahitit, i plagosuri kishte një plumb në kofshën e majtë si dhe një plumb që ka depërtuar tejpërtej.

Ndërkaq, zëvendëskomandanti i Policisë së Kosovës, Veton Elshani ka konfirmuar për Radion Evropa e Lirë se ende nuk ka arrestime lidhur me vrasjen e trefishtë në fshatin Gllogjan të Komunës së Deçanit.

Sipas Policisë, vrasjet dyshohen se u kryen me armë zjarri të llojit AK-47.

Dje, presidentja e Kosovës, Vjosa Osmani, dhe kryeministri Albin Kurti e kanë cilësuar ngjarjen si “tronditëse” dhe i kanë ftuar organet e rendit që t’i zbulojnë autorët e krimit dhe t’i sjellin para drejtësisë.

Ngjarjen e kanë dënuar edhe përfaqësues të tjerë të institucioneve dhe partive politike në Kosovë. Reagime pati edhe nga BE dhe shtetet fqinje.

Lajme të ngjashme

Leave a Reply

Your email address will not be published. Required fields are marked *

Back to top button