BNR: Mbetet vetoja bullgare për fillimin e bisedimeve të Shkupit me BE-në
Nuk ka ndryshim në qëndrimin e Bullgarisë për fillimin e negociatave me Maqedoninë e Veriut për anëtarësim në BE, në mbledhjen e djeshme të Këshillit për çështje të përgjithshme, raporton BNR, transmeton Portalb.mk.
Vetoja bullgare mbetet, megjithëse qëndrimi i prerë i Bullgarisë i planifikuar për dje, i cili duhej të paraqitej në Këshill, nuk u shpreh për shkak të tragjedisë në autostradën Struma, mësojnë mediat nga një burim diplomatik.
Përfaqësuesi i përhershëm në BE, Rumen Aleksandrov, fillimisht shprehu ngushëllime të thella për tragjedinë, pas së cilës theksoi se Maqedonia e Veriut ende nuk i plotëson kriteret për mbajtjen e konferencës së parë ndërqeveritare.
Siç njoftoi radioja bullgare, Aleksandrov shtoi se në muajt e fundit Bullgaria ka ofruar një sërë opsionesh për tejkalimin e çështjeve të pazgjidhura, siç janë garancitë për të drejtat e personave me identitet bullgar, dhe se Maqedonia e Veriut duhet të ndërmarrë angazhime konkrete, disa prej të cilave do të përmbushen në afat të shkurtër, ndërsa pjesa tjetër në kornizën e ardhshme negociuese.
“Derisa të ndodhë kjo, nuk mund të pritet përparim”, tha Alexandrov.
Sekretari i Shtetit në Ministrinë e Punëve të Jashtme të Sllovenisë, Gasper Dovzhan, edhe një herë shprehu shpresën e presidencës së BE-së se kjo çështje do të zgjidhet deri në fund të këtij viti.
“Ky proces duhet të zhvillohet në një spirale pozitive,” tha ai.
Kujtojmë se presidenti bullgar, Rumen Radev në Samitin e BE-së për Ballkanin Perëndimor më 6 tetor në Slloveni deklaroi se, përderisa bullgarët në Maqedoni i nënshtrohet asimilimit suptil dhe u shtypen të drejtat themelore në raport me etnitë tjera, Bullgaria nuk do të thotë “po” për fillimin e negociatave me BE-në.