fbpx

Pendarovski nga Glasgou: Jemi të gatshëm të japim pjesën tonë për aksionet klimatike (Video)

Presidenti i Maqedonisë së Veriut foli në seancën plenare të Samitit Botëror të liderëve për Ndryshimet Klimatike KOP26, në Glasgou të Skocisë, përcjell Portalb.mk.

“Si një vend kandidat për anëtarësim në BE, i gatshëm për të filluar negociatat, Maqedonia e Veriut tashmë është duke transpozuar legjislacionin evropian për ndryshimet klimatike në legjislacionin e saj kombëtar, duke mbështetur Marrëveshjen Evropiane të Gjelbër dhe ne jemi të gatshëm me pjesën tonë të kontribuojmë që Evropa të bëhet kontinenti i parë neutral ndaj karbonit deri në vitin 2050.” tha presidenti Stevo Pendarovski.

Presidenti shtoi se pavarësisht se jemi një vend i vogël evropian, ne kemi ambicie të mëdha klimatike, ku për këtë qëllim, kemi miratuar kontribute të rishikuara të vendosura në nivel kombëtar.

“Objektivi ynë ambicioz për vitin 2030 është të zvogëlojmë emetimet e gazeve serrë me 51 për qind, krahasuar me nivelet e vitit 1990.” tha Pendarovski.

Pendarovski theksoi se, duke zbatuar strategjinë afatgjatë të veprimit për klimën, ne po përpiqemi ta transformojmë vendin në një ekonomi me karbon të ulët, duke forcuar konkurrencën dhe duke promovuar kohezionin social.

“Përfshirja e shoqërisë në tërësi do të ndihmojë në trajtimin e papunësisë duke krijuar vende pune miqësore për mjedisin, duke reduktuar ndotjen nga burimet e rinovueshme dhe duke zhvilluar zakone të qëndrueshme përmes arsimit.” shtoi ai.

Pendarovski theksoi se vendi i ka marrë këto përgjegjësi përkundër disa sfidave strukturore për rritjen tonë ekonomike kombëtare, të përkeqësuara nga efektet shkatërruese të Covid-19, pasi beson fuqishëm se e vetmja rimëkëmbje e qëndrueshme nga pandemia është rimëkëmbja e mjedisit.

Ai theksoi se pandemia Covid-19 ende dominon axhendën botërore dhe se një nga rreziqet më të mëdha sistematike për njerëzimin nuk duhet nënvlerësuar.

Sipas tij, ajo që u premtua në samitin e kaluar të klimës në Paris, duhet të dorëzohet në Glasgou.

“50 vjet më parë, V. Х. Auden shkroi Himnin e Kombeve të Bashkuara. Në të ai thotë se “paqe do të thotë të bësh një ndryshim në kohën e duhur, ndërsa ora botërore po troket”. Për një kohë të gjatë, modelet e paqëndrueshme të prodhimit dhe konsumit të njerëzimit nuk janë sinkronizuar me ritmin e natyrës. Në këtë orë të fundit, është koha për të kthyer orën prapa në sistemin klimatik, në mënyrë që brezat e ardhshëm jo vetëm të mbijetojnë, por edhe të jetojnë në një botë të sigurt, dinjitoze dhe të begatë.” tha Pendarovski.

Presidenti Pendarovski do të marrë pjesë gjithashtu në pritjen e organizuar nga kryeministri britanik Boris Johnson për liderët e samitit dhe ngjarjen që shënon fillimin e angazhimit global për metanin, të iniciuar nga presidenti i SHBA-së, Joe Biden dhe presidentja e Komisionit Evropian, Ursula von der Leyen, si dhe mbledhja e liderëve “Veprim dhe Solidaritet – dekada kritike”, organizuar nga kryeministri britanik.

Sipas Zyrës së Kreut të Shtetit, qëllimi kryesor i Konferencës së OKB-së për Ndryshimet Klimatike – COP26 është të bashkojë liderët botërorë për të përshpejtuar veprimet drejt objektivave të Marrëveshjes së Parisit të gjashtë viteve më parë, për të mbajtur rritjen e temperaturës nën 1,5 gradë, duke demonstruar përkushtimin e tyre për një “normë neto zero emetimi” dhe një angazhim ndaj vendeve për të ndaluar përdorimin e qymyrit.

Lajme të ngjashme

Leave a Reply

Your email address will not be published. Required fields are marked *

Back to top button