KSHZ pritet sot t’i shpall rezultatet përfundimtare të rrethit të parë të zgjedhjeve

Komisioni Shtetëror Zgjedhor (KSHZ) sot në seancë publike duhet t’i shpallë rezultatet përfundimtare të raundit të parë të zgjedhjeve për kryetarë dhe këshilltarë në 80 komuna dhe në qytetin e Shkupit, njofton Portalb.mk.

Pritet që kryetari i KSHZ-së, Aleksandar Dashtevski, në seancën zyrtare të shpallë se në cilat komuna do të votohen kryetarët e komunave në rrethin e dytë të zgjedhjeve dhe ku do të përsëritet votimi nga rrethi i parë i zgjedhjeve. Duhet të shpallet zyrtarisht edhe numri i këshilltarëve që partitë dhe listat e pavarura fituan në zgjedhjet e së dielës.

Sipas rezultateve paraprake, në raundin e parë të 17 tetorit janë zgjedhur kryetarë komunash në 34 komuna. Në 44 të tjera, më 31 tetor do të mbahet raundi i dytë dhe në qytetin e Shkupit, ndërsa në dy komuna – Qendër Zhupë dhe Mavrovë-Rostushë do të rivotohet sepse në rrethin e parë nuk është arritur pragu i votimit për të marrë së paku një të tretën e votuesve të regjistruar në listën zgjedhore.

Afati për paraqitje për votim në rrethin e dytë të zgjedhjeve të personave me Kovid-19 dhe në izolim skadon më 25 tetor.

Personat e sëmurë dhe të pafuqishëm, persona e sëmurë me Kovid-19 dhe në izolim si dhe të burgosurit, personat në paraburgim dhe në shtëpitë e të moshuarve votojnë një ditë para zgjedhjeve, më 30 tetor.

Ndryshe, rrethi i dytë i zgjedhjeve lokale në Maqedoninë e Veriut do të mbahet me 31 tetor.