Teksas, Gjykata e Lartë nuk bllokon ligjin për abortin, cakton datën e seancës
Gjykata e Lartë nuk ka vendosur për bllokimin e menjëhershëm të ligjit të Teksasit që ndalon shumicën e aborteve, por ka rënë dakort të dëgjojë argumentat për këtë çështje në 1 nëntor, shkruan Zëri i Amerikës, transmeton Portalb.mk.
Gjykatësit thanë dje se ata do të vendosin nëse qeveria federale ka të drejtën ta ngrejë padi kundër këtij ligj.
Ky veprim i gjykatës lë kështu në fuqi për momentin një ligj që klinikat thonë se ka ulur me 80% abortet në shtetin e dytë më të madh të Amerikës.
Gjykatësja Sonia Sotomayor shkruajti se ajo do ta kishte bllokuar ligjin që tani.
“Premtimi për një gjykim në të ardhmen, ofron sidoqoftë një ngushëllim të ftohtë për gratë teksane që kërkojnë shërbim shëndetësor për abortin, të cilat kanë të drejtën që tani për një shërbim të tillë.” tha Sotomayor.
Ligji është në fuqi që në shtator, dhe u pezullua për vetëm 48 orë nga një gjykatë. Ligji ndalon abortin pas momentit kur mund të dëgjohet aktiviteti kardiak i fetusit, gjë që ndodh zakonisht në javën e gjashtë të shtatëzanisë dhe kur shumica e grave nuk e dinë ende që janë shtatëzana.
Kjo është shumë më herët se periudhat e parashikuara në vendime të mëparshme të Gjykatës së Lartë për lejimin e abortit. Sidoqoftë, Gjykata ka pranuar gjithashtu të shqyrtojë një kërkesë të shtetit Mississippi për të tejkaluar ato vendime.
Megjithatë, ligji i shtetit Teksas është shkruar në mënyrë që të shmangë shqyrtimin e hershëm nga gjykata federale, duke e lënë zbatimin në duart e qytetarëve dhe jo zyrtarëve të shtetit.
Argumentat në Gjykatën e Lartë nuk do të përqendrohen tek ndalimi i abortit, por tek fakti nëse Departamenti i Drejtësisë mund të padisë dhe të sigurojë urdhër gjykate për të ndaluar zbatimin e një ligji, thuhet në materialin e qarkulluar nga Gjykata e Lartë.
