Kasami: Nuk përjashtohet riorganizimi i qeverisë pas zgjedhjeve

Kandidati për kryetar të Komunës së Tetovës Bilall Kasami nga Besa në emisionin “24 analiza” në TV 24 tha se nuk duhet të përfitohet në kurriz të tragjedisë së Tetovës për të marrë vota. Ai mendon se situata duhet të shqyrtohet pas zgjedhjeve dhe nuk përjashtoi mundësinë e riorganizimit të qeverisë, transmeton Portalb.mk.

“Ekzistenca jonë është të ofrojmë zgjidhje për problemet aktuale. Sa i përket dorëheqjeve të ministrit dhe zëvendësministrit, situata është më komplekse dhe çdo dorëheqje e pranuar do t’i linte institucionet në një situatë të palakmueshme. Në momentin kur të përfundojnë zgjedhjet, kjo situatë duhet të rishikohet dhe besoj se do të reflektohet në rezultatet e zgjedhjeve. Të gjithë partnerët në Qeveri do të duhet të shohin se ku kanë gabuar për të bërë kombinatorikë në parti. Nëse vlerësojmë se duhet riorganizim, pse jo?, tha Kasami në debatin me kundër-kandidaten në raundin e dytë, kryetaren aktuale Teuta Arifi nga BDI e cila po lufton edhe për një mandat tjetër.

Ndryshe, dje kryetarët e partive opozitare VMRO-DPMNE dhe Aleanca për Shqiptarët, realizuan takim në Kuvend, në të cilin, ashtu siç informuan nga partia shqiptare, është biseduar për rrjedhën e procesit zgjedhor dhe veprimet e mëtejshme.

“Në takim është konfirmuar përkrahja reciproke në rrethin e dytë, për komunat për të cilat kemi pasur marrëveshje për rrethin e parë zgjedhor”, thuhej në kumtesën e ASH-së.

Rezultati i zgjedhjeve lokale të rrethit të parë, ka hapur debatin për mundësinë e koalicioneve të reja.

Funksionarët e partive në pushtet BDI dhe BESA, dje shprehën gatishmëri që koalicionit qeveritar t’i bashkëngjitet edhe Alternativa, e cila ka 4 deputetë dhe është në koalicion me Aleancën për Shqiptarët.

Megjithatë, nga ASH dje njoftojnë se koalicioni mes tyre është stabil dhe se po punojnë në krijimin e shumicës së re parlamentare.

“Njoftojmë opinionin se koalicioni mes Aleancës për Shqiptarët dhe Alternativës është stabil dhe bashkërisht punojmë në krijimin e shumicës së re parlamentare brenda një periudhe shumë të shpejtë”, thuhej në kumtesën e ASH-së.

Paraprakisht ASH-ja ka deklaruar që janë të gatshëm që ta mbështesin Bilall Kasamin e Lëvizjes BESA, i cili do të garojë në rrethin e dytë për kryetar të Tetovës në përballje me Teuta Arifin e BDI-së.

Edhe pse edhe BESA edhe BDI janë në koalicion qeveritar, ata do të duhet të përballen në nivel lokal. Por të dy partitë, thonë se kjo nuk përbën asnjë problem dhe se koalicioni qeveritar është stabil.

Kryeministri Zoran Zaev, në ndërkohë, deklaroi se anëtarësia e LSDM-së në Tetovë nuk do të ndikojë se për kë të votojë në rrethin e dytë në Tetovë.

Nga ana tjetër, kryetari i opozitës maqedonase, Hristijan Mickoski, nëpërmjet konferencës për shtyp kërkoi që e tërë opozita të bashkohen kundër pushtetit. Nga ana tjetër ASH-ja, deklaroi se pas zgjedhjeve lokale, pushteti aktual nuk ka legjitimitet.

Si kundërpërgjigje ndaj kësaj iniciative, Zoran Zaev u ka dërguar letër me thirrje për bashkim të gjitha partive të koalicionit qeveritar të udhëhequr dhe ata pastaj dolën me qëndrime se mbeten në qeveri.

Zaev duke u përgjigjur në pyetje gazetareske se a do të japë dorëheqje nëse e humb Shkupin dhe komunat tjera në rrethin e dytë, ai tha nuk mund të udhëheqë qeveri, nëse Qyteti i Shkupit dhe Komunat shkojnë mbrapa, gjegjësisht në drejtim të kundërt.

Në zgjedhjet lokale të 17 tetorit, në rrethin e parë, VMRO-DPMNE fitoi 22 komuna, LSDM 9 dhe BDI 3. Rrethi i dytë i zgjedhjeve lokale mbahet më 31 tetor.

• LEXO: Sela në takim me Mickoskin, pushteti thotë se koalicioni qeveritar është stabil
• LEXO: Aleanca për Shqiptarët e mblodhi Kryesinë Qendrore për të diskutuar për riformulimin e shumicës parlamentare dhe Qeverisë
• LEXO: RMV, u mbajt rrethi i parë i zgjedhjeve lokale 2021, gjithçka që ndodhi
• LEXO: RMV, rezultati final i rrethit të parë të zgjedhjeve lokale (Infografik)