“E majta” dhe Hristijan Mickoski gjatë fushatës zgjedhore shpenzuan më shumë para në Facebook (Infografik)
Gjatë fushatës parazgjedhore për zgjedhjet lokale, nga 13 shtatori deri më 12 tetor, më shumë reklama të paguara në Facebook kishin partia politike “E majta” dhe kreu i VMRO-DPMNE-së, Hristijan Mickoski, raporton Reflektor, transmeton Portalb.mk.
“Levica” gjatë asaj periudhe shpenzoi 8.353 euro, Mickoski 7.068 euro vetëm për reklamim në rrjetin social Facebook.
Pas tyre vjen kreu i LSDM-së dhe kryeministri Zoran Zaev, por me pothuajse dy herë më pak para të shpenzuara – 3.743 euro, pasuar nga kryetari aktual i Kumanovës, Maksim Dimitrievski, me 3.631 euro, ndjekur nga partia VMRO -DPMNE, me 3.171 euro. Më pas vijon përsëri kandidati i VMRO-DPMNE-së për kryetar të Komunës së Aerodromit, Timço Mucunski, me 2.967 euro. Llogaritur të gjithë bashkë, Hristijan Mickoski, Timço Mucunski dhe partia VMRO-DPMNE kanë shpenzuar 13.206 euro për reklama në Facebook.
Pas Mucunskit, në lista ndodhet Nevzat Bejta, kandidat i BDI-së për kryetar të Gostivarit, me 2.839 euro. Kryetari aktual i Shkupit, Petre Shilegov ka shpenzuar 2.702 euro, dhe kandidati i VMRO-DPMNE-së për kryetar të Shtipit, Ivan Jordanov, me 2.436 euro.
