Sulmuesi i Shkendijës Dashmir Elezi ndër gjashtëdhjetë futbollistët më të talentuar në botë

Sulmuesi i Shkendijes dhe anëtari i ekipeve të të rinjve të Maqedonisë, Dashmir Elezi ishte ndër gjashtëdhjetë futbollistët më të talentuar në përzgjedhjen e bërë nga e përditshmja britanike The Guardian, transmeton Portalb.mk.

Shtatëmbëdhjetëvjeçari Elezi përshkruhet si një lojtar që menaxhon më së miri në pozicionet anësore në sulm, luan mirë me këmbën e majtë dhe të djathtë.

Sipas Guardian, ai është  futbollist i shpejtë, i shkathët, inteligjent dhe është kënaqësi ta ndjekësh lojën e tij. Theksohet se në skuadrën e senjorëve debutoi në moshën 16 vjeç dhe se menjëherë në shfaqjen e parë arriti të hyjë në listën e golashënuesve.

Elezi gjithashtu është i ftuar standart në përfaqësueset e reja të Maqedonisë së Veriut ku disa herë ka gjetur edhe rrjetën.

Theksohet se deri më tani Elezi ka luajtur 30 ndeshje për Shkendijën dhe ka shënuar shtatë gola.