Biden mbështet fuqishëm integrimin e Ballkanit Perëndimor në BE

N. D. 11:45, 05-10-2021

Presidenti amerikan, Joe Biden, gjatë një video-mesazhi drejtuar presidentes së Kosovës, Vjosa Osmani, me rastin e ndarjes së Medaljes Presidenciale për Sundim të Ligjit, për djalin e tij të ndjerë, Beau Biden. — Presidenti amerikan, Joe Biden,

Presidenti i Shteteve të Bashkuara, Joe Biden, ka shprehur mbështetje të fuqishme për integrimin e vendeve të Ballkanit Perëndimor në Bashkimin Evropian.

Ai ka biseduar përmes telefonit me presidenten e Komisionit Evropian, Ursula von der Leyen, transmeton REL.

Shtëpia e Bardhë përmes një njoftimi tha se Biden shprehu mbështetjen e tij të fortë për vazhdimin e pranimit në Bashkimin Evropian të vendeve të Ballkanit Perëndimor.

Të dy udhëheqësit kanë diskutuar edhe për bashkëpunimin SHBA-BE, pandeminë e COVID-19 si dhe kanë adresuar çështjen e marrjes së hapave për të adresuar krizën klimatike.

Mbështetja e presidentit Biden vjen një ditë para se liderët e Bashkimit Evropian (BE) dhe kolegët e tyre nga vendet e Ballkanit Perëndimor të mbajnë samitin e tyre në Bërdo afër Kranjit në Slloveni.

Sipas burimeve diplomatike në Bruksel, të gjitha 27 vendet anëtare të BE-së janë pajtuar me tekstin e draftit të deklaratës që do të miratohet në këtë samit. Në të thuhet se liderët e BE-së përshëndesin përkushtimin e partnerëve nga Ballkani Perëndimor ndaj perspektivës evropiane, që sipas këtij dokumenti, “është në interes strategjik dhe mbetet një zgjedhje e përbashkët strategjike”.

Sikur edhe në deklaratat e mëhershme nga samitet e tilla edhe kësaj radhe do të përsëriten thirrjet për respektimin e parimeve të demokracisë, sundimit të ligjit, lirisë së mediave, shoqërisë civile, luftës kundër korrupsionit dhe krimit të organizuar, të drejtat e pakicave dhe kritereve tjera të cilat janë parime themelore të BE-së.

Presidentja e Komisionit Evropian, Ursula von der Leyen javën e kaluar zhvilloi një turne në vendet e Ballkanit Perëndimor. Ai shprehu mbështetje për integrimin e këtyre vendeve në BE.

Kujtojmë se, Bullgaria është kundër pranimit të Maqedonisë së Veriut për shkak të mosmarrëveshjeve historike dhe gjuhësore. Por edhe nëse ka ndonjë marrëveshje, gjendja e keqe pasqyron paralizën e planit të BE -së që të ndërtojë “unazë miqsh” nga Ukraina në Tunizi, duke ofruar lidhje më të ngushta, por edhe tregti dhe ndihmë.

Bullgaria nga fundi i vitit 2020, bllokoi fillimin e negociatave midis Maqedonisë së Veriut dhe BE -së dhe mbajtjen e konferencës së parë ndërqeveritare. Të dy vendet nënshkruan Marrëveshje për Fqinjësi të Mirë në vitin 2017, por përfaqësuesit e të dy vendeve kanë fajësuar njëri -tjetrin për shkeljen e marrëveshjes.