Bulevardi “Iliria”, projekti në realitet si prej “Ali Expressit”
Bulevardi “Iliria” ende nuk është realizuar në formën që u premtua katër vite më parë, edhe pse sipas kryetares së Komunës së Tetovës, Teuta Arifi ky projekt është nga fundi. Gazetari i Portalb.mk ishte në terren dhe vërtetoi mungesën e fontanave të ujit për pije, mbajtëseve metalike për drunjtë, disa kosha të mbeturinave dhe ndriçimin LED të ulëseve prej druri. Se pse nuk janë vendosur ende të njëjtat, nga Komuna e Tetovës refuzuan të përgjigjen në pyetjet e Portalb.mk, madje dy herë për të njëjtën temë.
Bulevardi “Iliria” në Tetovë nuk është realizuar ashtu siç u premtua. Kjo mund të vërehet thjeshtë duke i shikuar fotografitë e projektit që i ka shpërndarë paraprakisht Komuna e Tetovës dhe fotografitë që sot i kemi bërë ne në terren.
Kështu u premtua:
Kështu duket sot:
Në këtë bulevard janë vendosur shumica e ulëseve prej druri por mungojnë në pjesën më të frekuentuar të kësaj zone gjegjësisht para bibliotekës, disa e kosha për mbeturina dhe disa konstruksione për biçikleta. Nga Komuna e Tetovës nuk përgjigjën se pse ende nuk janë kryer të gjitha punimet e parapara në këtë bulevard.
Edhe pse çmimi i rekonstruimit të këtij sheshi është marramendës, aty mungojnë:
- 12 fontanat me ujë për pije,
- Mbrojtëset metalike të drurëve,
- Ndriçimi LED i ulëseve prej druri,
- Disa ulëse prej druri- janë vendosur shumica,
- Disa konstruksione për parkim të biçikletave- janë vendosur shumica,
- Disa shporta për mbeturina – janë vendosur shumica.
Edhe pse nga Komuna e Tetovës nuk deshën të përgjigjen në pyetjen e Portalb.mk, madje për të dytën herë për këtë boulevard, kryetarja e komunës disa muaj më herët deklaroi se është çështje javësh përfundimi i këtij projekti, ndërkaq, tha se do të vendosen edhe fontanat të cilat janë paraparë në projektin paraprak.
Por sot që flasim, pamjet nga terreni nuk përputhen me atë që kryetarja e Komunës së Tetovës deklaroi muaj më herët.
Rikujtojmë se ky bulevard e “dërgoi” komunën e Tetovës para gjykatës. Sipas komunës së Tetovës, marrëveshja me kompaninë ndërtimore për sheshin “Iliria” është ndërprerë për shkak të zvarritjes së punëve. Nga ana tjetër, nga kompania e cila akuzohet si e papërgjegjshme nga Komuna e Tetovës, demantojnë këtë të fundit duke potencuar se kontrata është prishur për shkak të mospagesës për punën e kryer. Ata shtojnë se ky projekt ka qenë i dështuar prej kur ka filluar, në të gjitha aspektet.
Ndryshe, kompania e cila e ka fituar tenderin për vazhdimin e punëve në bulevardin “Iliria” është ANNRA CENTRUM me seli në Reçicë të Vogël, kjo e fundit, punët duhet ti përfundoje 60 ditë pasi të filloje.
- LEXO: Tetovë, bulevardi “Iliria” assesi të përfundojë që të merr pamje “evropiane”
- LEXO: Tetovë, pak ulëse e asnjë fontanë, sheshi “Iliria” nuk i ngjan asaj që u premtua nga kryetarja Arifi
- LEXO: Tetovë, trotuaret e papërfunduara njollë e qytetit, premtimi ende nuk është realizuar (FOTO)
- LEXO: Tetovë, filloi largimi i shitësve ambulant
- LEXO: Bulevardi “Iliria” në Tetovë, larg nga ajo që u premtua (FOTO)
- LEXO: Projekti 500 mijë eurosh i Komunës së Tetovës për sheshin “Iliria” në gjykatë, punët në terren larg nga e premtuara
