Më gjashtë tetor në Slloveni do të zhvillohet Samiti BE-Ballkani Perëndimor
Samitit BE-Ballkan pritet të zhvillohet më 6 tetor në Slloveni, ku pritet të diskutohet edhe për perspektivën evropiane të Ballkanit Perëndimor, transmeton Portalb.mk.
Akoma nuk dihet se çfarë qëndrimi do të kenë, lidhur me Maqedoninë e Veriut dhe Shqipërinë, vendet anëtare në këtë Samit, por nuk përjashtohet mundësia që siç ndodh kohëve të fundit Bullgaria përsëri të bllokojë mbajtjen e konferencës së përbashkët ndërqeveritare RMV-BE, e për rrjedhojë edhe bllokimin e Shqipërisë.
Dy ditë më parë Reuters, raportoi anëtarët nuk i zbulojnë qëndrimet e tyre për këtë çështje, por sipas diplomatëve, vendet e pasura si Danimarka, Franca dhe Holanda kanë frikë nga përsëritja e integrimit të shpejtë si ai i Bullgarisë dhe Rumanisë në BE në vitin 2007. Por frikësohen edhe nga keqmenaxhimi i migrimit të fuqisë punëtore, siç është ajo me Britaninë e Madhe, gjë që bëri që shumë britanikë të jenë kundër BE-së.
Megjithatë, ambasadat e Francës dhe Danimarkës në Maqedoninë e Veriut, u shprehën se janë pro fillimit të negociatave me Maqedoninë e Veriut.
Bullgaria është kundër pranimit të Maqedonisë së Veriut për shkak të mosmarrëveshjeve historike dhe gjuhësore. Por edhe nëse ka ndonjë marrëveshje, gjendja e keqe pasqyron paralizën e planit të BE -së që të ndërtojë “unazë miqsh” nga Ukraina në Tunizi, duke ofruar lidhje më të ngushta, por edhe tregti dhe ndihmë.
Bullgaria nga fundi i vitit 2019, bllokoi fillimin e negociatave midis Maqedonisë së Veriut dhe BE -së dhe mbajtjen e konferencës së parë ndërqeveritare. Të dy vendet nënshkruan Marrëveshje për Fqinjësi të Mirë në vitin 2017, por përfaqësuesit e të dy vendeve kanë fajësuar njëri -tjetrin për shkeljen e marrëveshjes.
