fbpx

Është djegur Qendra e Regjistrimit në Zubin Potok, është sulmuar ajo në Zveçan

Ministri i Punëve të Brendshme i Kosovës, Xhelal Sveçla, ka bërë të ditur të shtunën se Qendra e Regjistrimit të Automjeteve në Zubin Potok është djegur nga persona të dyshimtë.

Sveçla po ashtu ka njoftuar se është sulmuar edhe Qendra e Regjistrimit Civil në Zveçan.

“Sot ora 01:00 pas mesnate, nga një akt kriminal me elemente terroriste të shkaktuar nga persona të dyshimtë është djegur Qendra e Regjistrimit të Automjeteve e cila gjendet në objektin e komunës në Zubin Potok. Policia e Kosovës ka dalë menjëherë në vendin e ngjarjes dhe së shpejti do të kemi më shumë informata. Po ashtu, është sulmuar edhe Qendra e Regjistrimit Civil në Zveçan ku dyshohet edhe për një mjet shpërthyes”, ka shkruar Sveçla në Facebook.

Sipas tij, këto veprime tregojnë për nevojën e prezencës së Njësisë Speciale të Kosovës në veri.

“Këto veprime kriminale tregojnë më së miri se çfarë do të ndodhte në pikat kufitare në Jarinjë dhe Bërnjak nëse nuk do të kishim praninë e njësive speciale për të garantuar rend dhe siguri. Ministria e Punëve të Brendshme me agjencitë e saj angazhohet për rend, siguri dhe sundim të ligjit dhe është garant i vendimeve sovrane të Qeverisë së Republikës së Kosovës dhe përkundër veprimeve të tilla do të vazhdoj me angazhim të plotë në zbatimin e vendimit në tërë territorin e Republikës së Kosovës. Ftojmë qytetarët në veri që të respektojnë ligjet dhe të mos dirigjohen apo manipulohen nga ata të cilët mbijetojnë politikisht, apo përfitojnë materialisht, vetëm falë tensioneve”, ka përfunduar ai.

Që gjashtë ditë, serbët në veri janë duke i mbajtur të bllokuara dy pikat kufitare Jarinjë e Bërnjak, në shenjë proteste për zbatimin e reciprocitetit me targa nga ana e Kosovës, shkruan Koha.net.

Ata kanë vendosur në rrugët e këtyre dy pikave kamionë dhe vetura duke pamundësuar kështu lëvizjen e veturave të tjera, derisa udhëtarët po detyrohen ta kalojnë kufirin në këmbë.

Lajme të ngjashme

Leave a Reply

Your email address will not be published. Required fields are marked *

Back to top button