21 vite pa piktorin e “dheut” Adem Kastratin
Piktor, publicist, dramaturg dhe analist i marrëdhënieve shqiptaro-sllave evrobotërore, Adem Kastrati lindi më 15 janar të vitit 1933 në Karaçevë të epërme, komuna e Kamenicës në Kosovë.
Ai i takon gjeneratës së parë të piktorëve pas Luftës së dytë Botërore, vepra e të cilëve janë krijuar në Kosovë dhe në Maqedoninë e Veriut. Ai punoi si profesor i artit figurativ në gjimnazin “Zef Lush Marku” në Shkup, për 20 vite rresht kur asnjëherë nuk iu nda ditarit, në 1986 pensionohet para kohe, shkaku i sëmundjes nga veshkat, po edhe shkaku i ndjekjeve të UDB-së të cilës nuk i pëlqenin pikturat e tij me “kuq e zi” dhe vizatimet e Gjergj Kastriotit Skënderbeut.
Kastrati lindi në Karaçevë të Epërme në një familje të madhe patriotike dhe bujare, daja i tij ishte atdhetari Metush Krasniqi. Shkollën normale e kreu në Gjakovë, kurse studimet për pikturë në Shkup. Prej vitit 1958, ka qenë anëtar i Shoqatës së Artistëve Figurativ të Kosovës, prej 1968 u bë anëtar i Shoqatës së Artistëve Figurativ të Maqedonisë, kurse 1977, anëtarë i Lidhjes Ndërkombëtare të Artit.
I ndjeri ka pasur shumë ekspozita të pavarura në Shkup, Tetovë, Gostivar, Strugë, Ferizaj, Prishtinë, Beograd, Tiranë, Gjilan, Gjakovë, Paris, Gjenevë, Mynih, Sarajevë, Damask, Aman, Ankara, Stamboll, Lubjanë, Zagreb, Dubrovnik, Suboticë, Novi Sad, Palermo etj. Ka marrë pjesë edhe në ekspozita grupore: Lubjanë, Zagreb, Dubrovnik, Nish, Palermo, Tiranë, Beograd, Paris, Arhis (Danimarkë), etj.
Në shenjë falënderimi, ai i ka pikturat edhe personaliteteve të njohur të skenës politike që ndihmuan çështjen shqiptare, ndër personalitetet më të njohura të cilëve u ka dhuruar piktura janë: ish – presidenti i SHBA – ve, Bill Klinton, ish-Sekretarja amerikane e punëve të jashtme, Medlin Ollbrajt, ish – ministrit britanik i punëve të jashtme, Robin Kuk, etj. Këtë gjest piktori e ka bërë me rastin e hapjes së ekspozitës me tematikë nga lufta e Kosovës.
Adem Kastrati ndërroi jetë më 24 shtator të vitit 2000 në Shkup, duke e lënë një veprimtari të gjerë multidimensionale.