Pendarovski: BE -ja duhet ta mbajë derën hapur për Ballkanin Perendimor
E ardhmja e Ballkanit Perëndimor është në Bashkimin Evropian. Bashkimi Evropian duhet ta mbajë derën hapur, jo vetëm për shkak të nevojës për rezultate serioze në fushën e kritereve evropiane për demokracinë, sundimin e ligjit, luftën kundër korrupsionit, por edhe për shkak të mundësisë së përdorimit të një vakumi të mundshëm nga faktorë të jashtëm, të cilat promovojnë koncepte gjeopolitike, të cilat nuk bazohen në vlerat e përgjithshme evropiane, transmeton Portalb.mk.
Kështu u shpreh Presidenti Stevo Pendarovski, i cili mori pjesë në takimin e 20-të të nivelit të lartë të organizuar nga Qendra Ndërkombëtare Nizami Ganxhavi në Nju Jork, i cili u zhvillua në margjinat e Asamblesë së 76-të të Përgjithshme të Kombeve të Bashkuara. Presidenti u drejtua në temën “Çfarë do të thotë paqja dhe stabiliteti në shekullin 21?” në kuadër të sesionit “Fjalim special: Paqe dhe stabilitet: E ardhmja e Ballkanit Perëndimor”.
Siç njoftoi Kabineti i Pendarovskit, Presidenti foli për përvojat e vendeve në rajonin e Ballkanit Perëndimor pas rënies së komunizmit, duke konstatuar se për një numër arsyesh objektive, siç janë konfliktet në ish -Jugosllavi, shkatërrimi ekonomik, çështje të shumta të hapura, asnjë vend në rajon nuk mund të llogaritet si udhëheqës i periudhës post-komuniste në Evropë.
Presidenti iu referua përvojave të Republikës së Maqedonisë së Veriut, duke theksuar kompromiset e bëra me fqinjët, anëtarësimin në NATO dhe angazhimin për integrimin e vendit në Bashkimin Evropian. Pendarovski deklaroi se ruajtja e perspektivës së anëtarësimit në Bashkimin Evropian është shtytësi kryesor i reformave, jo vetëm në vendin tonë, por edhe në Ballkanin Perëndimor, ndërsa vetë anëtarësimi – kyç për të siguruar stabilitet afatgjatë, paqe dhe prosperitet në rajon.
Në këtë drejtim, duke përshkruar ngecjen e dukshme në proceset integruese të të gjitha vendeve të Ballkanit Perëndimor në vitet e fundit, Presidenti Pendarovski, siç thuhet, shprehu shqetësim dhe paralajmëroi se pasiguria e këtij plani mund të ndikojë ndjeshëm në paqen dhe stabilitetin në rajon. Presidenti nënvizoi se rezultati i bllokimit aktual është ritmi i ngadalshëm i reformës dhe rritja e euro-skepticizmit në të gjitha vendet e Ballkanit Perëndimor.
Në fjalimin e tij, Presidenti theksoi rëndësinë e marrëdhënieve midis Bashkimit Evropian dhe Shteteve të Bashkuara, kur fliste për paqen dhe stabilitetin në Ballkanin Perëndimor, duke konstatuar se sa herë që marrëdhënia midis BE-së dhe Shteteve të Bashkuara ishte e mirë dhe e fortë, atëherë shiheshin edhe përfitimet për rajonin, Evropën dhe rajonin Euro-Atlantik në tërësi.
Përndryshe procesi euroitegrues i vendeve të Ballkanit Perendimor ka ngecur në vend numero. Shqipëria dhe Maqedonia e Veriut i kanë plotësuar kushtet. Për të parën të gjitha vendet e BE-së janë dakord për nisjen e negociatave, megjithatë një gjë të tillë e penalizon problemi i Maqedonisë së Veriut me Bullgarinë. Maqedonia dhe Shqipëria janë në një paketë, por nëse vonesat për zgjidhjen e ngërçit Bullgari-Maqedoni zgjasin shumë, flitet edhe për një ndarje të mundshme midis dy vendeve në këtë proces.
