fbpx

Të mbijetuarit e zjarrit në Tetovë, burrë e grua dëshmojnë për Portalb: gjithçka ndodhi shpejtë

Portalb.mk ju sjell dialogun e gazetarit tonë në Tetovë me një burrë dhe një grua të cilët i kanë mbijetuar tragjedisë së mbrëmshme në spitalin për COVID në Tetovë. Burri ka qenë pacient në spitalin modular ndërsa gruaja e tij është kujdesur për të. Ata kërkuan të jenë anonim.

Burri: Ndodhi shumë shpejtë, në momentin që duhej të viheshe një vajzë e re në reanimacion në dhomën tjetër, kur i kanë pru aparatet për reanimim ka pasur problem elektrik, diçka u ndez dhe përnjëherë u paraqit zjarri. Në këtë moment s’e pash vet por e dëgjova prej shoqes, edhe them çka u bë? Bashkëshortja e fshehi prej meje që mos ta shoh unë pamjen që të mos mërzitem se jam i sëmurë, pjesërisht i palëvizshëm. Në ato momente filloi të shpërndahet zjarri shumë shpejtë.

Gruaja: Kërkonte doktoresha ujë për ta fik zjarrin (te ajo dhoma), ia dhashë dhe e mshela derën. Këto (pacientët) këtu (te dhoma jonë) ishin të gjithë me oksigjen. Të mos i shqetësoj pacientët në dhomën tonë, mendova të rregullohet situata pak, t’i hapi dritaret. Por më pas krejt infermieret dolën, mjekët dolën jashtë, neve na lanë pa ujë në zjarr të digjemi krejt. E hapa dritaren, e hoqa telin, shoh prej larg askush s’vjen të më ndihmojë. E nxora telin dhe e nxora dhe burrin nga spitali, për dritare e kam nxjerrë.

Burri: Mjekët nuk janë të trajnuar mjaftueshëm për raste të tilla, janë njerëz të dobët, sigurisht që janë munduar që të shpëtojnë veten e tyre nga ai zjarri i madh.

Burri: Materiali shumë lehtë digjet, menjëherë u dogj. S’pamë që kishte aparate për ta ndalur zjarrin. S’kishte standarde që duhet materiali prej të cilit është ndërtuar spitali. Materiali duhet të jetë që s’digjet, e ai ishte me standard si për të ruajtur mall. Duhet dhe të ketë staf të trajnuar për fatkeqësi.

Burri: Pasi dolëm prej dritares, dolëm në park të qetësohemi, të marr frymë sepse e kam problem frymëmarrjen për shkak sëmundjes. Ikëm sa ma larg prej zjarrit. Zjarrfikësit mjaft u munduan që të shpëtojnë njerëz, por edhe ato ishin vonë, 5 minuta ishte vonë.

Gruaja: Te dhoma që ishim ne, mbetën një vajzë me nënën e vetë dhe një grua vdiq, vetëm ne dhe një plak arritëm të dalim. Plakun e nxorën familjarët prej dritares.

Burri: Prej 11 shpëtuam vetëm 3. Në dhomat tjera nuk e di se zuri të bie objekti, mezi dolëm. Nuk pati eksplozion.

Gruaja: Sa dolëm u fik rryma dhe ishte terr. Fola në telefon me fëmijët për tu thënë që kemi mbijetuar.

I sëmuri ende është në mjekim në Spitalin e Tetovës. Çifti ishte shumë i shqetësuar dhe guaja ndër lot tregonte përjetimin.

Ata shprehën ngushëllimet e thella të tyre për familjet e viktimave dhe shpresojnë që kjo ngjarje do të zbardhet së shpejti dhe do të ketë përgjegjësi.

Lajme të ngjashme

Leave a Reply

Your email address will not be published. Required fields are marked *

Back to top button