Pendarovski: Urdhër për Merita Ushtarake për të gjithë pjesëtarët e ARM-së të cilët ishin në mision në Afganistan

Të gjithë ushtarët e Maqedonisë, të cilët kanë qenë pjesë e misionit në Afganistan gjatë 20 viteve të fundit do të marrin Urdhër për merita ushtarake-ka njoftuar kreu i shtetit dhe komandanti i përgjithshëm në përvjetorin e sotëm të Armatës. Rënia e shpejtë e vendit dhe kthimi i talibanëve në pushtet e vërtetuan rëndësinë e misioneve ndërkombëtare në të cilat vendi, me më shumë se 3,300 trupa, ka marrë pjesë në dy dekadat e fundit. Rotacioni  i parë i misionit në Afganistan filloi kur ne ishim vend kandidat, kurse i fundit e përfundoi atë kur ne jemi anëtar i NATO-s.

“Kur e bëjmë përmbledhjen e këtij misioni sot, është e qartë se pa pjesëmarrjen në misionin në Afganistan nuk do të ishim bërë anëtarë të aleancës së NATO-s. Për 20 vjet, paqeruajtësit nga Maqedonia i ndihmonin popullit të Afganistanit të jetojë në një mjedis më të qëndrueshëm dhe të gjitha këto pa asnjë viktimë nga paqeruajtësit tanë! Imazhet e tmerrshme që vinin nga ai vend ditët e fundit nuk ishin të mundshme derisa ushtarët tanë së bashku me 130 mijë paqeruajtës nga 50 vende të botës ishin atje. Kjo është arsyeja pse unë vendosa të shpërblej Urdhrin për merita ushtarake të gjithë anëtarët e Armatës, të cilët kanë qenë në misione në Afganistan gjatë dy dekadave të fundit. Ushtarët tanë e merituan atë”, tha Presidenti i Republikës së Maqedonisë së Veriut, Stevo Pendarovski, transmeton VOA.

Në këto 20 vjet, pjesëmarrja e Maqedonisë kaloi pa humbje njerëzore, megjithëse ka pas  situata jashtëzakonisht të rrezikshme. Situata aktuale në Afganistan, nga ku qytetarët e Maqedonisë u evakuuan, po monitorohet me vëmendje. Zhvillimi i shpejtë i ngjarjeve dhe imazheve të kaosit në aeroportin e Kabulit ishin një nga argumentet që vendi unë të hapë dyert dhe të ndihmojë.

“Rotacioni i fundit, ushtarak, së bashku me ekipin mjekësor u kthyen në shtëpi të sigurt në fund të qershorit të këtij viti. Në ato dy dekada nuk kishim humbje dhe kishim lëvdata të shumta për gatishmërinë e ushtarëve tanë gjatë detyrave të tyre. Me shqetësim po e ndjekim përshkallëzimin e situatës në Afganistan dhe dështimin e institucioneve afgane për të garantuar stabilitet për qytetarët e tyre. Ky dështim dhe imazhet dramatike të Kabulit nuk duhet të lënë askënd indiferent, kështu që ne vendosëm të mos heshtim. Si një vend që ka përdorur ndihmën e huaj në të kaluarën, kemi ofruar mbështetje dhe pranim për qytetarët afganë”, tha ministrja e Mbrojtjes Radmila Sekerinska.

Pritet që deri në fund të javës, që do të varet nga rrethanat në aeroportin në Kabul, me fluturime të organizuara, të arrijnë shumica e 450 qytetarëve të Afganistanit, informojnë nga Qeveria. Janë punonjës, ose gra dhe fëmijë nga familjet e atyre që punuan për misione humanitare dhe paqeruajtëse, aktivistë të organizatave për të drejtat e njeriut, gazetarë, përkthyes, studentë. Qeveria siguron se nuk ekziston rreziku i një krize me migrantë, ndërsa shpenzimet për akomodimin e këtyre njerëzve në disa hotele dhe motele në vend do të paguhet nga organizatat ndërkombëtare dhe SHBA. Plani është që këta 450 persona, në periudhën në vijim, të shkojnë në SHBA ose në vende të tjera.