Vendosen masat e reja në Kosovë

Qeveria e Kosovës të enjten ka vendosur për masat e reja në luftën ndaj COVID-19. Masat e reja kryesisht lidhen me kushtëzimin që qytetarët të mund të hyjnë në kafe apo klube të natës. Ata nuk do të mund ta bëjnë këtë pa dëshmuar se kanë marrë vaksinën apo kanë test negativ PCR në 72 orët e fundit, raporton Koha.net.

Tjetër dëshmi për t’u lejuar hyrja në klube të natës apo organizim të ahengjeve familjare është edhe dëshmia se personi e ka kaluar COVID-19 në 6 muajt e fundit. Një pjese të gastronomisë me këtë rast i është zgjatur orari i punës. Ato do të lejohen të punojnë deri në orën 03:00.

Masat e reja vlejnë nga 20 gushti.

Në konferencën për media, ministri i Shëndetësisë, Arben Vitia, ka thënë se do të rritet ndjeshëm mbikëqyrja e respektimit të masave. Ai ka thënë se masat janë marrë për shkak të shpërndarjes së madhe të variantit Delta të COVID-19.

“Për shkak se varianti Delta ka qenë dominues në pjesën më të madhe të shteteve të Evropës, një valë e përfshirjes nga ky variant edhe në vendin tonë ka qenë e pashmangshme. Shkallën e shpërndarjes në krahasim me variantin alfa e ka së paku katër herë më të lartë. Ky variant dominon prej mbi 80 për qind të rasteve me COVID-19 në rastet e reja. Kjo na detyron t’i zbatojmë masat”, ka thënë Vitia.

Po ashtu janë ndarë 80 mijë euro për angazhim të 50 infermierëve për procesin e vaksinimit. Masat e reja janë vendosur në ditën kur në Kosovë u regjistruan 1009 raste të reja me COVID-19.

Lajme të ngjashme

Leave a Reply

Your email address will not be published. Required fields are marked *

Back to top button