RMV, këta kushte duhet të plotësohen nga studentët për të marrë mbështetje financiare nga  2400 denarë për ushqim

Në muajin tetor pritet që 40 mijë studentë në Maqedoninë e Veriut të shfrytëzojnë mbështetje financiare prej 2400 denarëve për ushqim, por duhet të plotësojnë disa kushte, transmeton Portalb.mk.

“Kjo mbështetje financiare do të startoj nga muaji tetor i këtij viti, ndërsa studentët, për të marrë mjete, përveç që të jenë shtetas të Republikës së Maqedonisë së Veriut, duhet të plotësojnë edhe kushtet në vazhdim:  të mos jenë në marrëdhënie të rregullt të punës; të mos jenë të regjistruar si bujq individual dhe të mos kenë të ardhura mujore më të madhe se paga minimale në vitin vijues”, njoftojnë nga Ministria e Arsimit dhe Shkencës.

Kjo mbështetje financiare është për studentët në ciklin e parë të studimeve në institucione shtetërore e private.

Më 6 korrik, Ministria e Arsimit dhe Shkencës në Maqedoninë e Veriut ka premtuar që nga tetori 40 mijë student do të marrin nga 2 400 denarë në muaj si mbështetje financiare për strehim dhe ushqim.