RMV, MPB sërish paralajmëron ngecje në dhënien e dokumenteve personale – do të transferohen në sistem të ri
Ministria e Punëve të Brendshme e Republikës së Maqedonisë së Veriut i informon qytetarët se për shkak të migrimit në sistem të ri, prej datës 23. 06. 2021 (e mërkurë) duke filluar prej orës 21 deri më 27. 06. 2021 (e diel deri në orën 21) nuk do të jetë në funksion sistemi për pranim dhe dhënie të dokumenteve personale (letërnjoftim, pasaportë dhe patentë shoferi), njofton Portalb.
“Për këto shkaqe njoftohen qytetarët të cilët kanë caktuar termin për aplikim për dokument personal me procedurë urgjente në ditët 23, 24 dhe 25 qershor 2021, të vijnë në hapësirat e Ministrisë ku kanë të caktuar termin për dokument personal më 22. 06. 2021 gjatë gjithë ditës së punës ose më 23. 06. 2021 deri
në orën 12”, informojnë nga MPB.
Qytetarët të cilët kanë termin të caktuar për më 23, 24 dhe 25 qershor 2021, në procedurë të rregullt, të drejtën e parashtrimit të kërkesës për dokument personal, do të mund ta realizojnë në cilindo termin në vendin e njëjtë ku kanë caktuar në periudhën prej 28. 06. 2021 deri më 02. 07. 2021.
Dokumentet e gatshme personale qytetarët mund t’i marrin deri më 23. 06. 2021 deri në fund të orarit të punës, sepse më 24 dhe 25 qershor nuk do të jetë e mundur dhënia e tyre.
