Filluan takimet e partive politike për ndryshimet zgjedhore në Maqedoninë e Veriut
Debati për ndryshimet zgjedhore të paralajmëruar një kohë të gjatë në Maqedoninë e Veriut, ka filluar sot me pjesëmarrjen e shumicë së partive në takimin e parë, derisa është paralajmëruar që bisedimet të vazhdojnë javën e ardhshme transmeton Portalb.mk.
“Nën organizimin e Ministrisë së Drejtësisë në Klubin e deputetëve, pasdite është mbajtur mbledhje e Grupit të Punës për ndryshimin e Ligjit Zgjedhor”, njoftojnë nga Ministria e Drejtësisë, duke theksuar se kanë marrë pjesë parti të ndryshme, si LSDM, VMRO-DPMNE, BDI, Aleanca për Shqiptarët, BESA, Alternativa, E majta, etj.
Raportohet që në takim si përfaqësues të ndryshmeve ligjore ishin edhe ministri i drejtësisë, Bojan Mariçiq dhe ministri i punëve të brendshme Oliver Spasovski.
“Në takimin e parë që kaloi në atmosferë konstruktive, u hapën çështjet politike në raport me modelin zgjedhor dhe ndryshimet e mundshme. Gjithë përfaqësuesit i shprehën qëndrimet e tyre, propozimet dhe mendimet për ndryshimet”, njoftojnë nga Ministria e Drejtësisë.
Ndryshe, të paralajmëruara disa herë nga zyrtarë të ndryshëm të Qeverisë së Maqedonisë së Veriut, ndryshimet ligjore për Kodin Zgjedhor ende nuk janë realizuar. Pjesë e këtyre ndryshimeve duhet të jenë edhe listat e hapura për këshilltarët në zgjedhjet lokale në tetor. Edhe pse kanë mbetur disa muaj nga zgjedhjet, ndërsa listat e kandidatëve duhet të dorëzohen më herët, Ministria e Drejtësisë ende nuk e ka përgatitur ligjin.
- LEXO: RMV, ende nuk janë gati ndryshimet në Kodin Zgjedhor për lista të hapura
- LEXO: Zaev dhe Mickoski në takim tet-a-tet u dakorduan për çështjen e regjistrimit, Kodit Zgjedhor dhe zhbllokimin e Kuvendit
- LEXO: Dështoi debati kuvendor për ndryshimet zgjedhore
- LEXO: Lista të hapura për këshilltarë në zgjedhjet lokale vitin e ardhshëm, paralajmëroi Milevski