RMV, Qeveria nuk dorëzohet nga ligji për ndërtimet ilegale, do të fshijë vetëm nenin mbi legalizimin në zonat e mbrojtura

N. D. 12:10, 19-05-2021

Çair, urbanizëm, legalizim, ndërtime, banesa, Seravë, Shkup — Foto nga Portalb.mk/Suad Bajrami

Ligji për legalizimin e ndërtesave të paligjshme do të vendoset përsëri para deputetëve, por do të pësojë ndryshime, gjegjësisht nuk do të lejohet legalizimi objekteve në zonat e mbrojtura. Në seancën e djeshme të qeverisë, u vendos që Qeveria të ngre debat publik me palët e interesuara, si dhe konsultime me grupet parlamentare dhe me kryetarët e Parlamentit dhe shtetit, me qëllim që të arrihet zgjidhje më e mirë ligjore, transmeton Portalb.mk.

“Në atë drejtim, do të jenë të hapur për finalizim dhe zgjidhjet më të mira për propozimet që i referohen periudhës kohore që duhet të përfshijë legalizimin e ndërtesave të paligjshme, pastaj dallimin real midis ndërtesave që janë për banesa personale dhe atyre që janë ndërtuar si ndërtesa banimi për përfitim, si dhe çështja për dispozitë kategorike dhe të qartë ligjore se legalizimi nuk do të përfshirkë objektet të ndërtuara në mënyrë të paligjshme në zona të mbrojtura, si dhe të gjitha çështjet e tjera të ngritura nga publiku dhe qytetarët”, njoftuan nga Qeveria.

Kuvendi më 11 maj, me 72 vota të qeverisë dhe opozitës, miratoi Ligjin për legalizimin e ndërtesave të paligjshme. Me zgjidhje ligjore, lejohej legalizimi i ndërtesave të paligjshme në zonat e mbrojtura, të tilla si parqet kombëtare, rezervatet natyrore, monumentet natyrore, zona e trashëgimisë së mbrojtur reale kulturore, si dhe në zonën e parë dhe të dytë të sanitare-mbrojtëse të burimeve të ujit të pijshëm, me pëlqimin e marrë nga organi kompetent. Sipas nenit 41 të këtij ligji, ndërpriten procedurat për prishjen e ndërtesave të paligjshme, por ndërpriten edhe procedurat administrative dhe gjyqësore (procedimet penale dhe civile) që janë në vazhdim e sipër, të cilat dalin nga procedurat për largimin e ndërtesave që janë përfunduar ose janë në përfundim sipër dhe procedurat në lidhje me ndërtimin e objekteve të paligjshme.

Për shkak të këtyre dispozitave, Presidenti Stevo Pendarovski nuk e nënshkroi Dekretin për shpalljen e Ligjit dhe kështu tani Kuvendi do ta rishikojë ligjin në fazën e leximit të tretë, brenda 30 ditëve nga dita e miratimit të tij, dhe nëse miratohet me shumicë votash nga numri i përgjithshëm i deputetëve, Presidenti i Republikës është i detyruar ta nënshkruajë dekretin.

Presidenti nuk e nënshkroi Dekretin pasi konsideron se Ligji është në kundërshtim me disa nga vlerat themelore të Kushtetutës. Ai konsideron se ligji jo vetëm që i vendos qytetarët në pozitë të pabarabartë, duke privilegjuar ata që nuk i përmbahen rregullave ligjore në dëm të qytetarëve të ndërgjegjshëm të cilët kanë vepruar në përputhje me rregulloret në fuqi kur ndërtojnë objekte, por, për më tepër, stimulon mosrespektimin e rregulloreve ligjore. Ai gjithashtu tha se me Ligjin, bëhet ndërhyrje në punën e gjykatave dhe siguron amnisti “të fshehur” për autorët e veprave penale të lidhura me ndërtimin e paligjshëm dhe keqpërdorimin e detyrës zyrtare.

Edhe Asociacioni i arkitektëve të Maqedonisë (AAM) sdje bëri thirrje për mos-sjelljen e një ligji të ri për të përcaktuar statusin ligjor të objekteve të ndërtuara në mënyrë të paligjshme pasi pezullon të gjitha rregulloret e zbatueshme të planifikimit urban që kujdesen për cilësinë e hapësirës së ndërtuar dhe jep sinjalin e gabuar se ndërtimi i paligjshëm nuk do të ndëshkohet.