fbpx

Tetovë, premtohet nga viti 2016, Konvikti Studentor drejt përfundimit (FOTO)

Nga Ministria e Arsimit dhe Shkencës nuk japin datë konkrete se kur do të përfundojnë punët për ndërtimin e konviktit studentor në Tetovë, megjithatë, gazetari i Portalb.mk ishte sot në vendin ku ndërtohet dhe verifikoi se punët janë nga fundi. Sipas kontratës, punët duhet të përfundojnë për maksimum 3 muaj. Bëhet fjalë për konvikt studentor me gjithsej 305 shtretër, shkruan Portalb.mk.

Një javë më herët Qeveria e Maqedonisë së Veriut në seancën e 61 kishte ndarë gjithsej 11.200.000 denarë për konviktin studentor në Tetovë i cili është duke u ndërtuar afër Universitetit të Tetovës, gjatë rrugës për në Bërvenicë.

Informojmë se edhe pse në Tetovë ka dy universitete dhe shtatë shkolla të mesme në të cilat vijnë edhe nxënës nga qytete të ndryshme, ky është konvikti i parë studentor publik i cili po ndërtohet aktualisht dhe është drejt përfundimit.

Kështu dukej sot ky konvikt studentor:

Konvikti Studentor në Tetovë.
Konvikti Studentor në Tetovë.
Konvikti Studentor në Tetovë.
Konvikti Studentor në Tetovë.

Rikujtojmë intervistën e Portalb.mk në tetor të vitit të kaluar me një studente nga Republika e Kosovës, pikërisht për këtë problem. Ajo atëherë tha se detyrohet për një dokument të thjeshtë të udhëtojë nga Kosova në Maqedoninë e Veriut, për shkak se e njëjta e ka pasur problem të gjejë dikë me të cilën do ta ndante dhomën, sepse çmimi për të banuar vetë, është shumë i shtrenjtë.

“Kam kërkuar edhe online edhe fizikisht kur arrita në Universitet, edhe ata nguronin edhe unë nguroja, është problem të pyesësh dikë se a do të jetojë me ty, thjesht nuk munda të gjejë një cimere, konvikt studentor në Universitetin e Tetovës nuk kishte, tash detyrohem të udhëtojë për një dokument të vogël”, tha ajo.

Ajo kishte theksuar se çmimet për banim nuk janë shumë të shtrenjta në momentin që ke bashkëbanuese, por jo gjithmonë dëshiron të ndash dhomën me 3 persona tjerë si dhe nuk është e lehtë t’i gjesh të njëjtat.

“Jo, çmimi është i shtrenjte në qoftë se jeni dy apo je vet,  mirëpo jo gjithkush ka mundësi të jetojë me vetëm 1 bashkëbanuese apo të gjeje 3 të tjera”, shtoi studentja e Universitetit të Tetovës, B.A.

Sipas kontratës, punimet duhet të përfundojnë në muajin maj/qershor të këtij viti

Të kontaktuar nga Portalb.mk, nga Ministria e Arsimit dhe Shkencës informuan se projekti po realizohet me dinamikën e paraparë, që i bie se i njëjti duhet të përfundojë në maj/qershor të vitit të ardhshëm.

“Ndërtimi i shtëpisë studentore në Tetovë është investim me vlerë prej 166,5 milion denarëve dhe i njëjti realizohet më përputhje me dinamikën e paraparë. Me projektin e përgatitur nga Universiteti i Tetovës, objekti do të ketë 305 krevat” thanë nga Ministria e Arsimit dhe Shkencës.

Përveç dhomave të fjetjes, në këtë shtëpi studentore është parapa të ketë edhe dhomë teknologjike, leximore, sallë ku studentët do të mund të ushtrojnë fitness, hapësirë për meze, etj.

Premtohet nga viti 2016

Në të njëjtën ditë kur Qeveria e Maqedonisë së Veriut miratoi ligjin për themelimin e Universitetit “Nënë Tereza” u paralajmërua edhe ndërtimi i konviktit studentor në Tetovë, bëhet fjalë për vitin 2016, në të njëjtin vit u hap edhe tenderi për ndërtimin e këtij konvikti.

Kujtojmë se ministër i Arsimit dhe Shkencës në atë kohë ishte, tashmë i ndjeri, Abdylaqim Ademi.

Megjithatë, përkundër faktit se tenderi për ndërtim u hap në shtator të vitit 2016, nuk kishte vendim për fillim të punëve, ky vendim zyrtarisht u morr në fund të marsit të vitit 2018 dhe ishte paraparë që ky objekt të finalizohet në prill të këtij viti.

Ndryshe, jozyrtarisht nga Ministria e Arsimit dhe Shkencës na thanë se ky objekt pritet të përfundoje në maj ose qershor të vitit të ardhshëm, andaj studentët do të mund të vendosen në këtë konvikt nga viti i ardhshëm akademik.

Lajme të ngjashme

Leave a Reply

Your email address will not be published. Required fields are marked *

Back to top button