Vjosa Osmani mori edhe zyrtarisht detyrën e presidentes së Kosovës
Vjosa Osmani edhe zyrtarisht sot mori detyrën e presidentes së Kosovës, nga ushtruesi i deritanishëm i këtij posti Glauk Konjufca, transmeton Portalb.mk.
Osmani u zgjodh presidente e vendit të dielën, me 71 vota për në Kuvendin e Kosovës.
Pas marrjes së detyrës, Osmani do të vazhdojë gjatë ditës me një sërë aktivitetesh.
Presidentja Osmani do të bëjë homazhe te varri i Ibrahim Rugovës dhe Adem Jasharit.
Që prej 5 nëntorit, 2020, Kosova ka qenë me ushtrues detyre të presidentit, pasi Hashim Thaçi pati dhënë dorëheqje nga kjo pozitë, pas konfirmimit të aktakuzës për krime lufte dhe krime kundër njerëzimit nga Dhomat e Specializuara në Hagë.
Osmani, ish-zyrtare e Lidhjes Demokratike të Kosovës, në zgjedhjet parlamentare të 14 shkurtit ka garuar në listë të përbashkët me Lëvizjen Vetëvendosje dhe ka marrë më së shumti vota, përkatësisht, mbi 300 mijë.