LDK-ja do të marrë pjesë në votimin për Osmanin presidente

Lidhja Demokratike e Kosovës ka vendosur që të marrë pjesë në votim në procesin e zgjedhjes së presidentit.

Kryetari i kësaj partie, Lumir Abdixhiku, pas takimit me deputetët e LDK-së ka thënë se kjo parti është në politikë “për të dhënë zgjidhje”.

“Me forcën politike që kemi momentalisht kam pasur dy mundësi, një të mos marrë pjesë në seancë ose të jemi pjesë e zhvillimeve. Kemi zgjedhur të dytën. Kemi bërë kështu sepse këtë rrugë LDK-ja e ka ndjekur përherë. Kemi diskutuar për pozitën apolitike të zonjës Osmani si presidente. Këto biseda ua kam prezantuar organeve të partisë. Pas një diskutimi, të gjithë kemi marrë vendim që LDK-ja nuk do të bëjë obstruksione. LDK-ja do të marrë pjesë në votim, pa paragjykuar vendimin e deputetëve. Këtë vendim ua kam komunikuar deputetëve. Pres që secili prej tyre të mos e pengojë kursin e ri të LDK-së. Pres që secili të sillet si institucionalist”, ka thënë ai në konferencë për media, njofton KTV.

LDK-ja ka fituar 15 ulëse në Kuvend.

Për të zgjedhur presidentin, në votimin e tretë duhet të jenë 80 vota minimum, me 61 prej tyre pro një kandidati. Vetëvendosje ka 58 vota, ndërsa pritet t’i ketë edhe 8 të tjera nga minoritetet jo shumicë. Bashkë me to, i duhen minimum 14 vota nga LDK-ja për të siguruar kuorumin e nevojshëm.

Osmani në listën e VV-së në garë mori pjesë si pretendente për presidente. Ajo mori mbi 300 mijë vota.