“Plagjiaturat”, këto janë punimet origjinale dhe të vjedhura nga profesorët e UT-së, NIRCAU: Mos u merrni me ne, por me punimet

Është e vërtetë që jemi anonim, por kjo assesi nuk e zbeh kredibilitetin tonë për të denoncuar hulumtimet e vjedhura, deklaruan nga nisma e hulumtuesve anonim të cilët në Revistën “Veritas” publikuan plagjiaturat e disa profesorëve të Universitetit të Tetovës. Sot, këta hulumtues kanë dërguar në redaksinë e Portalb linqet e plagjiaturave të vjedhura të të gjithë profesorëve të akuzuar, shkruan Portalb.mk.

Nga Nisma Intelektuale për Rritjen e Cilësisë në Arsimin Universitar potencuan se sipas tyre, Universiteti i Tetovës udhëhiqet nga mafia akademike dhe gjithkush që i del kundër kësaj të fundit, “persekutohet” si në kohën e komunizmit.

“Ne jemi anonim por kjo nuk e zhbën kredibilitetin tonë për të denoncuar hulumtimet e vjedhura, dhe ju për atë duheshe të jepni një deklaratë më dinjitoze, edhe pse shumica jeni në lidhje gjaku me njëri tjetrin. Se deri në këtë shkallë është privatizuar ky institucion publik, i shenjtë për shqiptarët e Maqedonisë së veriut, deri diku e dinim, por me mënyrën e mbarëvajtjes së faqes zyrtare të Universitetit në rrjetin social facebook (fshirja e komenteve negative të vetë studentëve të atij institucioni), rreshtimi i gardës së ‘sherrit’ dhe ‘llajkut’ në facebook, vërtetuan edhe njëherë se çdokush që tenton të prek këtë ‘mafi akademike’ do të ndiqet e ‘persekutohet’ si në kohë të komunizmit” kumtojnë nga NIRCAU.

Nga NIRCAU ftojnë Universitetin e Tetovës që të merret me plagjiaturat dhe jo me autorët e hulumtimit, të njëjtit kanë shtuar një dokument në të cilin sipas tyre, UT-ja ka qenë e paralajmëruar nga muaji korrik se avancimi akademik i Kenan Feratit nuk ka qenë ligjor.

“Për t’ua dëshmuar të kundërtën e reagimit zyrtar të Universitetit të Tetovës, ua dërgojmë linqet e hulumtimeve të vjedhura dhe hulumtimeve nga të cilat është realizuar vjedhja. Detyra e institucionit ndoshta nuk është të komentojë ‘zbulimet’ e ‘revistave’ me autorë anonim, por është obligim ligjor i juaji të parandaloni avancimet akademike kur veçmë keni qenë të paralajmëruar më datë 09/07/2020 në ora 15:37, gjashtë ditë para përmbylljes së Gazetës Zyrtare (Buletini numër 166) se avansimi akademik i z.Kenan Feratit nuk është ligjor, nuk plotësohen kushtet minimale ligjore për avansim, por ju vazhduat ashtu siç dini ju (duke shkelur nenin 166, paragrafi 2, pika 2 dhe 3, të Ligjit për Arsim të Lartë)” kumtuan nga NIRCAU.

Këto janë punimet nga profesorët e Fakultetit të Mjekësisë, dhe origjinalet

Nexhbedin Beadini – klikoni KËTU për të parë hulumtimin e parë të vjedhur të tij, ndërsa klikoni KËTU për të parë hulumtimin origjinal. Klikoni KËTU për të parë hulumtimin e dytë të vjedhur nga ana e tij ndërsa klikoni KËTU për të parë hulumtimin origjinal. Klikoni KËTU për të parë hulumtimin e tretë të vjedhur nga ana e tij ndërsa klikoni KËTU për të parë hulumtimin origjinal. Beadini është nga fshati Kamjan i Tetovës dhe aktualisht i punësuar si profesor i biologjisë së qelizës dhe gjenetikës humane, në Fakultetin e Mjekësisë pranë Universitetit të Tetovës. Tre punime të tij, sipas NIRCAU, kanë rezultuar të jenë plagjiaturë.

Sheqibe Beadini – klikoni KËTU për të parë hulumtimin e parë të vjedhur të saj, ndërsa klikoni KËTU për të parë hulumtimin origjinal. Ajo është bashkëshortja e të lartpërmendurit, ajo është aktualisht e punësuar si profesoreshë e Biokimisë dhe Fiziologjisë në Fakultetin e Mjekësisë, pranë Universitetit të Tetovës, punimi i saj, sipas hulumtimit të NIRCAU, ka rezultuar gati tërësisht plagjiaturë.

Albulena Beadini – klikoni KËTU për të parë hulumtimin e vjedhur të saj, ndërsa klikoni KËTU për të parë hulumtimin origjinal. Beadini është e bija e të dy personave të lartpërmendur, e njëjta është aktualisht e punësuar si asistente në Fakultetin e Mjekësisë, pranë Universitetit të Tetovës, punimi i saj, sipas NIRCAU, ka rezultuar 100% plagjiaturë, gjegjësisht, kjo e fundit ka ndryshuar punimit vetëm emrin e shtetit nga ku e ka vjedhur punimin.

Emira Bexheti – klikoni KËTU për të parë hulumtimin e vjedhur të saj, ndërsa klikoni KËTU për të parë hulumtimin origjinal. Bexheti është gjithashtu e punësuar në Fakultetin e Mjeksësisë në UT, kjo e fundit ligjëron gjenetike humane dhe biologji të qelizës si asistente. Raporti i “NIRCAU” ka vlerësuar punimin e saj shkencor si të vjedhur, gjegjësisht, plagjiaturë.

Mirlind Bexheti – klikoni KËTU për të parë hulumtimin e vjedhur të tij, ndërsa klikoni KËTU për të parë hulumtimin origjinal. Mirlind Bexheti ishte i punësuar në Fakultetin e Mjekësisë pranë Universitetit të Tetovës, ai është asistent i lëndës Farmakologji. Sipas NIRCAU, i njëjti ka vjedhur punimin shkencor dhe më pas e ka prezantuar si të tijin. Portalb.mk mëson se ky i fundit aktualisht nuk është duke punuar në UT.

Destan Halidi – klikoni KËTU për të parë hulumtimin e vjedhur të tij, ndërsa klikoni KËTU për të parë hulumtimin origjinal. Haliti është i punësuar në Fakultetin e Mjekësisë pranë Universitetit të Tetovës si asistent i neurologjisë, sipas NIRCAU, punimi shkencor “i tij” realisht ka rezultuar të jetë plagjiaturë.

Ekrem Ismani – klikoni KËTU për të parë hulumtimin e vjedhur të tij, ndërsa klikoni KËTU për të parë hulumtimin origjinal. Ismani gjithashtu i punësuar në Fakultetin e Mjekësisë pranë UT-së, ai ligjëron Transfuziologji dhe Patofiziologji, punimi i tij gjithashtu ka rezultuar të jetë plagjiaturë, sipas NIRCAU.

Inspektorët sot kanë arritur në Universitetit e Tetovës, nuk dihet sa do të zgjasë inspektimi

Inspektorati i Arsimit sot ka hyrë në hapësirat e Universitetit të Tetovës për të hulumtuar në lidhje me rastin e studimit të revistës anonime “Veritas” për plagjiaturat dhe shkeljet e mundshme tjera ligjore të disa profesorëve në Fakultetin e Mjekësisë. Nga ky inspektorat për Portalb.mk theksuan se nuk dihet sa ditë do të zgjasë inspektimi.

Të pyetur se kur do të dihet epilogu i këtij inspektimi të jashtëzakonshëm, nga Inspektorati i Arsimit theksuan se një gjë e tillë ende nuk dihet, pasi që inspektimi mund të zgjasë disa ditë.

“Inspektimi ka filluar sot, nuk dihet se a do të mbarojë për një ditë dhe sa do të zgjasë, pasi të jetë gati raporti atëherë mund të deklarohemi për mediat” theksuan për Portalb.mk nga Inspektorati i Arsimit.

Ndërkaq, ankesa për plagjiatura dhe shkelje tjera të mundshme ligjore në Fakultetin e Mjekësisë pranë Universitetit të Tetovës deri te Inspektorati i Arsimit ka arritur me datë 17 mars, pikërisht në ditën kur edhe u bë publike studimi i “Veritas”.

Portalb.mk sërish ka tentuar të kontaktojë dhe pret përgjigje nga gjithë të akuzuarit për plagjiaturë dhe për arritje në vendin e punës duke mos respektuar Ligjin për Arsim të Lartë, të njëjtit nuk përgjigjen në pyetjet tona.

• LEXO: Skandali me plagjiatet në Universitetin e Tetovës, kush po akuzon kë?
• LEXO: Skandali me plagjiatet, NIRCAU demanton dekanin Nevzat Elezi
• LEXO: Inspektorati i Arsimit e konfirmon për Portalb: Ditëve në vijim do të ketë inspektim në Universitetin e Tetovës
• LEXO: Skandali me plagjiatet, zëvendës ministri i Arsimit: nëse vërtetohen akuzat të dënohen plagjiatorët
• LEXO: Nga Universiteti i Tetovës komentojnë skandalin me plagjiatet: Janë tentativa për të na njollosur si institucion
• LEXO: “Plagjiaturat”, inspektorët kanë arritur në Universitetit e Tetovës, nuk dihet sa do të zgjasë inspektimi