Disa projekte të premtuara të Ganiut nuk janë realizuar, arsyetimi i komunës: Pandemia zvarrit proceset
Qendër Klinike për fëmijë, objekt i ri për qendër rinore, parkingje prapa bllokut banesor në bul. Nikolla Karev, parkingje në udhëkryqin Xhon Kenedi dhe Kemal Sejfulla dhe qarqe rrugore rr.Cvetan Dimov, janë disa nga projektet e premtuara të kryetarit të Komunës së Çairit, Visar Ganiu, të cilat nuk janë realizuar për më shumë se tre vite, që kur ai ka ardhur në krye të kësaj komune, shkruan Portalb.mk.
Ganiu gjatë fushatës parazgjedhore, premtoi buxhet prej 112,310,860.00 denarë (1.841,161,64 euro) për qendër klinike për fëmijë. Ai kishte paraparë rekonstruim i objektit ekzistues 66,740,860 denarë (1,094,112 euro) dhe zgjerim të pjesës së re 45,570,000.00 denarë (747,049 euro).
Në kontratën e tij, Ganiu kishte premtuar edhe objekt të ri për qendër rinore, për të cilën kishte paraparë buxhet prej 15,300,000.00 den (250,819 euro).
“Me strategjinë e planifikuar parashihet realizimi i plotë i qendrave rinore në rr. Seravë në pozicion të objektit ekzistues të bashkësisë vendore. I njëjti do të jetë i karakterit publik me qëllim të afrimit të gjeneratave të reja të komunës”, qëndron në “Kontratën” e Ganiut.
Ndërkohë, për pjesën e infrastrukturës, kishte paraparë buxhet të përgjithshëm prej 158,332,118.00 denarësh (2,595,608 euro), me të cilin ai premtoi se do të realizojë një sërë projektesh në infrastrukturë, mes të tjerash parkingje prapa bllokut banesor në bul. Nikolla Karev, parkingje në udhëkryqin Xhon Kenedi dhe Kemal Sejfulla dhe rrethrrotullime në disa rrugë, përfshirë edhe atë “Cvetan Dimov”.
Megjithatë, asnjëri nga këto projekte nuk ka filluar ende të realizohet, edhe pse kanë mbetur vetëm disa muaj nga përfundimi i mandatit të kryetarit të Komunës së Çairit, Visar Ganiu.
Nga kjo komunë thanë për Portalb.mk se po bëhen përpjekjet maksimale për realizimin e këtyre projekteve.
“Ashtu siç pjesa më e madhe e projekteve të premtuara tashmë janë realizuar dhe kanë filluar rrugën e realizimit – siç janë projekti tashmë i përfunduar i ndërtimit të tribunës së stadiumit të K.F. Shkupit dhe objekti i ri administrativ i klubit në rrjedhë e sipër, procesi i filluar ndërtimor për çerdhen e re “Bambi”, procesi dinamik i ndërtimit të objektit shtesë të SH.F. Ismail Qemali, projekti i përfunduar i ndërtimit të palestrës sportive të SH.F.K Kongresi i Manastirit me emrin Alush Hamidi, rrethrrotullimi në bulevardin “Brigada e Dytë Maqedonase”, qendra ekzistuese rinore në rrugën Kemal Sejfulla dhe shumë projekte tjera në më shumë sfera për të cilat në vazhdimësi i kemi njoftuar qytetarët, po bëhen përpjekjet maksimale edhe për fillimin e realizimit të projekteve të theksuara nga ana juaj duke përfshirë ndërtimin e Qendrës Klinike për Fëmijë, objektit tjetër të qendrës së re rinore, parkingjeve dhe rrethrrotullimeve të parapara”, thuhet në përgjigjen e kësaj komune.
Ata më tej kanë shtuar se zvarritja e këtyre projekte është shkaktuar nga situata me pandeminë, si dhe vërejtjet që vijnë nga Qyteti i Shkupit dhe Ministria e Transportit në lidhje me planet detale urbanistike.
“Duke e pasur parasysh situatën me pandeminë e virusit Covid 19, po punojmë me kapacitetin e lejuar në këto rrethana dhe me përkushtim maksimal për miratimin e planeve të reja detale urbanistike në përputhje me procedurat ligjore, të cilat do të na lejojnë edhe veprimin e mëtutjeshëm për realizimin e projekteve tjera të premtuara. Në lidhje me planet detale urbanistike, duhet theksuar se vërejtjet e Qytetit të Shkupit dhe Ministrisë së Transportit dhe Lidhjeve jepen kohë pas kohe dhe jo si një tërësi, gjë që na e vështirëson realizimin e projekteve të premtuara. Rreth zhvillimeve të reja në këtë drejtim në kohë ashtu si çdoherë do të informojmë qytetarët”, theksuan nga Komuna e Çairit.
Në “Kontratën” e tij, Ganiu kishte parashikuar buxhet prej 1,156,293,957,00 denarë (18.8 milionë euro) për ndërtimin e 4 garazheve në kate në territorin e kësaj komune.
Ai kishte premtuar se do të ndërtohen garazhe në kate në “Saat Kullë”, për çka kishte parapara buxhet pre 176,668,200 denarë, (2,8 mln euro) garazh në kate te Teatri Shqiptar, ku kishte paraparë buxhet prej 112,455,000 denarë (1.8 mln euro). Garazhe në kate po ashtu, ishin premtuar edhe te Sheshi Skënderbeu dhe te “Çairçanja”, për të cilat ishte paraparë buxhet prej 786,169,857 denarë (12,7 mln euro) dhe 81,000,000 denarë (1,3 mln euro).
- LEXO: Komuna e Çairit ende nuk i ka dorëzuar kërkesat e përpunuara për ndërtimin e garazheve në kate
- LEXO: Koalicioni Aleanca për Shqiptarët dhe Alternativa: Ganiu në këto 4 vite nuk ka realizuar projektet e premtuara (VIDEO)
- LEXO: Komuna e Çairit tre vite nuk ka arritur t’i përgatisë planet për garazhet në kate, Ministria e Transportit i ka kthyer kërkesat (VIDEO)
- LEXO: U vendos gurthemeli për ndërtimin e shtesës së SHFK “Ismail Qemali”, projekti do të realizohet me ndihmën e donatorëve (VIDEO)
- LEXO: Ganiu “harroi” premtimet për garazhe në kate dhe parkingje nëntokësore, veturat mbeten të parkuara në trotuare
- LEXO: Visar Ganiu nuk ka realizuar premtimet parazgjedhore për shkollat fillore “Imri Elezi” dhe “Kongresi i Manastirit”
- LEXO: U premtua gjatë fushatës zgjedhore, Sh.F “Ismail Qemali” nuk është rikonstruuar ende
- LEXO: Intervistë me kryetarin e Komunës së Çairit, Visar Ganiu: realizimi i disa projekteve nuk varet nga ne (VIDEO)
- LEXO: #DebatPernime për Zgjedhjet Lokale në Maqedoni, sonte në Çair (VIDEO)
