fbpx

Nga Universiteti i Tetovës komentojnë skandalin me plagjiatet: Janë tentativa për të na njollosur si institucion

Nga Universiteti i Tetovës sot për herë të parë kanë komentuar skandalin me plagjiaturat. Ata thonë se hulumtimet shkencore në Universitetin e Tetovës janë në përputhje me të gjitha kriteret dhe kushtet. Për pohimet e ish dekanit, Kastriot Haxhirexha se është shkarkuar sepse ka ngritur zërin për këtë, nga UT-ja shprehen se ai është larguar për keqmenaxhim, joefikasitet dhe mosreagim ndaj parregullsive, shkruan Portalb.mk.

Nga ky Universitet konsiderojnë se nuk është detyre e tyre që të komentojnë “zbulimet e revistave të cilat nuk kanë autorë”, megjithatë, potencojnë se “veprimtaria hulumtuese shkencore zhvillohet në përputhje me të gjitha kriteret shkencore.”

“Universiteti i Tetovës e ndjek me vëmendje publikimin e “informacioneve”, që  hedhin dyshime për hulumtimet shkencore të disa profesorëve në Fakultetin e Shkencave të Mjekësisë.  Edhe pse nuk është në detyrën e institucionit tonë që t’i komentojmë “zbulimet” e “revistave” me autorë anonim, e njoftojmë opinionin publik se veprimtaria arsimore, hulumtuese shkencore e njësive akademike në Universitetin e Tetovës, zhvillohet në përputhje dhe respekt të plotë të kritereve shkencore. Avancimet akademike, mbrojtja dhe publikimi i punimeve shkencore u nënshtrohen mekanizmave filtrues, që e verifikojnë apo e s’kualifikojnë një kontribut të caktuar hulumtues” kumtuan nga Universiteti i Tetovës.

Ndërkaq, në lidhje me pohimet e ish dekanit të Fakultetit të Mjekësisë se i njëjti është shkarkuar nga detyre për shkak se ka ngritur zërin për fenomenin e plagjiaturave, nga UT-ja e pohojnë të kundërtën, ata theksojnë se Kastriot Haxhirexha është shkarkuar për shkak të joprofesionalizmit.

“Sa i takon lirimit nga detyra të ish-dekanit të Fakultetit të Shkencave të Mjekësisë, Prof. Dr. Kastriot Haxhirexhës, e njoftojmë opinionin publik se, rektori i Universitetit këtë vendim e ka sjellë si pasojë e keqmenaxhimit, joefikasitetit në punë, mosreagimin në kohë ndaj parregullsive dhe shkeljes së etikës së punës, mosmarrjen e përgjegjësive ligjore-statutore dhe moskoordinimin me Këshillin Mësimor –Shkencor të kësaj njësie akademike” deklaruan nga UT-ja.

Ndryshe, për Universitetin e Tetovës këto publikime janë thjeshtë tentativa për të njollosur këtë institucion nga botues anonim, revista pa adresë dhe persona me agjenda të dyshimta.

Aktualisht pritet inspektimi i Inspektoratit të Arsimit

Inspektorati Shtetëror të Arsimit duke u përgjigjur pyetjes së Portalb.mk potencoi se ankesa për këtë çështje deri tek adresa e tyre ka arritur jo më herët se dje, ai konfirmoi se për këtë do të ketë inspektim në terren ditëve në vijim.

“Po, ankesa legjitime për plagjiatura të mundshme në Universitetin e Tetovës ka arritur deri te ne dje. Andaj, ditëve në vijim inspektorët do të dalin në teren të shohin se për çfarë bëhet fjalë, pra të shihet gjendja faktike” thanë nga Inspektorati Shtetëror i Arsimit.

Të njëjtën e pohuan edhe nga Ministria e Arsimit dhe Shkencës, të cilët gjithashtu garantuan se “Inspektorati Shtetërorë i Arsimit si institucion kompetent do të veproje sipas detyrimeve ligjore për këtë rast konkret”.

Ish-dekani i Fakultetit të Mjekësisë në UT për Alsat M: Pretendimet e “Veritas” për plagjiaturë janë të vërteta

Ish dekani i Fakultetit të Mjekësisë, Kastriot Haxhirexha deklaroi sot se reagimi i tij për këto plagjiatura i ka kushtuar me largimin nga posti i dekanit të këtij fakulteti. Ai nuk pajtohet me dekanin aktual, Nevzat Elezi se deri te UT-ja nuk kanë arritur ankesa për këtë çështje, Haxhirexhexha madje thotë se “janë bombarduar me e-maila”.

Kastriot Haxhirexha, ish dekan i Fakultetit të Mjekësisë.
Kastriot Haxhirexha, ish dekan i Fakultetit të Mjekësisë.

“Ka një vit, që nga marsi i vitit të kaluar që unë personalisht si dekan i fakultetit të shkencave të mjekësisë, rektori i UT, zyra për shkencë e UT, dhe disa pedagog eminent, janë bombarduar me emaile të këtilla bombarduese……. Në mbledhjen e parë që kemi pasur për avancimin në gradë akademike të njërit prej profesorëve që u apostrofua  në revistën Veritas gjitha të vërtetat u zbuluan dhe kemi debatuar ashpër në këshillin mësimor, sepse unë kam mbrojt dinjitetin e fakultetit të mjekësisë dhe UT se nuk mund të  mbyllim sytë dhe të tejkalojmë këta probleme sepse problemi nuk mbyllet me mbulim”, tha Kastriot Haxhirexha, Ish dekan i Fakultetit të Mjekësisë”.

Ai gjithashtu hedh poshtë pretendimet e dekanit aktual se disa prej punimeve që akuzohen për plagjiaturë nuk kanë përfunduar, Haxhirexha potencon se këto punime veçse janë publikuar në revista shkencore.

“Unë dëgjova dje prononcimin edhe të dekanit që më zëvendëson mua, dhe vërtetë më vjen keq që arsyetohet me atë se punimet janë në proces e sipër, sepse këto janë punime të botuara. Këto janë punime të botuara në revistë dhe këtu nuk ke më çka të korrigjosh. Gjithsecili qytetar nuk ka nevojë të më pyes mua apo dikë tjetër se a janë të vërteta këto pretendime të Veritas? Merre punimin fute në sistemin anti plagjiaturë dhe del çdo gjë. Unë personalisht si dekan disa prej këtyre punimeve normal që i kam futur në sistemin anti plagjiaturë dhe më kanë rezultuar njëqind për qind të sakta pretendimet që bën pala që denoncon”, pohoi Kastriot Haxhirexha, Ish dekan i Fakultetit të mjekësisë” theksoi Haxhirexha për Alsat M.

Ndryshe, në emailin e redaksisë së Portalb.mk, të martën (16 mars) ka arritur një dokument (PDF) i cili është nënshkruar se është bërë nga “hulumtuesit e Iniciativës për Përmirësimin e Kualitetit në Arsimin e Lartë (NIRCAU)” dhe që mban emrin “Revista Veritas”. Në të, thuhet se disa profesorë të Fakultetit të Mjekësisë të Universitetit të Tetovës, titullin e tyre e kanë marrë në mënyrë jo të ligjshme, gjegjësisht duke vjedhur punime nga të tjerët pa i cituar ata si dhe dy prej tyre, kanë arritur të bëhen profesorë duke mos e respektuar Ligjin për Arsim të Lartë.

Portalb.mk sërish ka tentuar të kontaktojë dhe pret përgjigje nga gjithë të akuzuarit për plagjiaturë dhe për arritje në vendin e punës duke mos respektuar Ligjin për Arsim të Lartë, të njëjtit nuk përgjigjen në pyetjet tona.

Zëvendës ministri i Arsimit, Arafat Shabani për Portalb: Në qoftë se vërtetohen akuzat, të dënohen plagjiatorët

“Në qoftë se vërtetohen akuzat e profesorëve të Universitetit të Tetovës për plagjiaturë, të njëjtit duhet të marrin dënimin e merituar” tha zëvendës ministri i Arsimit dhe Shkencës, Arafat Shabani sot për Portalb.mk duke komentuar studimin e “Veritas” sipas së cilit akuzohen 9 profesorë të Fakultetit të Mjekësisë pranë UT-së për plagjiaturë dhe shkelje të Ligjit për Arsim të Lartë

Arafat Shabani potencoi se për këtë rast është informuar ditëve të fundit dhe se nuk ka qenë në dijeni më herët, ai shtoi se përgjegjësia në këtë rast është individuale në qoftë se akuza vërtetohet me fakte relevante.

“Jam informuar ditëve të fundit për publikimin e disa plagjiaturave në disa punime shkencore të disa profesorëve në UT. Unë si zv/Ministër i Arsimit dhe Shkencës përkrah idenë që çdo parregullsi apo skandal i mundshëm duhet zbuluar, dhe nëse vërtetë verifikohen këto akuza, atëherë akterët e involvuar pa asnjë dyshim duhet të marrin dënimin e merituar. Secili duhet të mbajë përgjegjësi individuale për keqpërdorime të mundshme në UT” tha Arafat Shabani, zëvendës ministër i Arsimit dhe Shkencës.

Lajme të ngjashme

Leave a Reply

Your email address will not be published. Required fields are marked *

Back to top button