Zaev nesër pritet të pranojë vaksinat e para anti-kovid nga Vuçiq

F1 C 22:04, 13-02-2021

Vaksinat e para në Maqedoninë e Veriut pritet të futen nesër në mëngjes përmes pikës kufitare në Tabanoc, si donacion nga Qeveria e Serbisë, transmeton Portalb.mk.

“Nesër në ora 10:00 në pikën kufitare Tabanoc do të arrijë dërgesa e vaksinave nga Republika e Serbisë”, njoftojnë nga Qeveria e Maqedonisë.

Qeveria sqaroi që vaksinat do të dorëzohen nga presidenti serb Aleksandër Vuçiq, ndërsa do të pranohen nga kryeministri Zoran Zaev.

Këto pritet të jenë vaksinat e para anti-kovid që do të arrijnë në Maqedoninë e Veriut, përkundër që autoritetet janë shprehur të gatshëm të fillojnë me procesin e vaksinimit të popullatës, duke hapur edhe ueb-faqe për të aplikuar për vaksinim.

Ndryshe, sjellja e vaksinave si donacion nga Serbia në Maqedoninë e Veriut, ishte paralajmëruar të ndodhë më 11 shkurt, por u prolongua për disa ditë, ndërsa si arsye për këtë dy qeveritë theksuan dokumentacionin teknik.

Për të siguruar mbrojtje ose imunizim kolektiv, gjegjësisht për të ndërprerë përhapjen e kovid-19, siç thonë nga Organizata Botërore të Shëndetësisë, është e nevojshme që rreth 70% e popullatës të vaksinohen. Derisa shteti po i pret dozat e para të vaksinave, ekspertët shëndetësorë vlerësojnë se duhet kohë për të vaksinuar 70 përqind të popullsisë në mënyrë që, të themi kushtimisht, të mund të “merrnim frymë” më lirshëm.