Travelers Cycling- ueb aplikacion që ndihmon çiklistët të arrijnë më lehtë në vendin ku synojnë

Parkingje, shtigje, pompa, shërbime, çezma dhe pengesat për biçikleta janë mbledhur në një vend për qytetet e Shkupit, Manastirit, Ohrit, Kërçovës, Berovës dhe Prilepit në ueb-aplikacionin Travelers Cycling. Bëhet fjalë për një ide të zhvilluar nga një grup preferuesish të çiklizmit në vend, ku aplikacioni është i vetmi në llojin e tij në vend dhe synon të ndihmojë çiklistët të arrijnë më lehtë qëllimin e tyre, njofton Portalb.mk.

“Rrjeti i biçikletave është i ndarë në disa kategori, mes të cilëve shtigjet e biçikletave, trotuaret / rrugët në të cilat është e sigurt të ngasësh biçikletë, ndërsa përbën lidhje të dy shtigjeve të biçikletave, shtigjeve malore (off-road), etj”, u shprehën entuziastët e Travelers Cycling.

Në aplikacion mund të gjendet edhe parkingu më i afërt për biçikleta, vendndodhja e shërbimeve publike për riparim të biçikletave, si dhe vendndodhja e pompave të ajrit, të cilat ndodhen kryesisht në pompat e benzinës.

“Gjatë krijimit të aplikacionit, fillimisht përfshijmë informacionet më të nevojshëm për një çiklist, siç është vendndodhja e shatërvanëve / çezmave, të cilat janë mjaft të rëndësishme gjatë ditëve të verës, dhe raportimi i një pengese ose ndërprerje të përkohshme në një shteg të veçantë biçikletash. Një pjesë të madhe të informacioneve i posedojmë me mbledhje vetanake të të dhënave, por një pjesë tjetër ë të dhënave i marrim nga ndjekësit dhe bashkëpunëtorët, të cilat rriten nga dita në ditë”, shpjegojnë nga Travelers Cycling.

Aplikacioni është plotësisht jofitimprurës dhe qëllimi i vetëm është të motivojë njerëzit që të përdorin biçikletën më shumë si një mjet transporti, i cili do të rrisë kulturën e trafikut, do të zvogëlojë bllokimin e trafikut në rrugë, dhe si rezultat do të zvogëlojë vetë ndotjen e ajrit.

Gjithashtu në pjesën “blog” mund të gjenden informacione dhe lajme në lidhje me çiklizmin, si dhe këshilla për zgjedhjen, përdorimin e duhur dhe mirëmbajtjen e biçikletës.