RMV-ja është renditur në vendin e 78-të në indeksin global të demokracisë sipas “The Economist”
Maqedonia e Veriut në Indeksin Global të Demokracisë për vitin 2020 botuar nga revista “The Economist”, ndodhet përpara Bosnjë e Hercegovinës dhe Malit të Zi, ndërsa pas Serbisë dhe Shqipërisë. Vendi në renditjen e fundit është në vendin e 78 me rezultat prej 5.89, i cili përfshin vendin në grupin e të ashtuquajturve “regjime hibride”. Pas vendit tonë, Bosnja dhe Hercegovina renditet e 101-ta, ndërsa Mali i Zi renditet i 81-ti në listën globale, njofton Portalb.mk.
Më mirë të renditur se Maqedonia janë Serbia në vendin e 66-të, ndërsa Shqipëria është në vendin e 71-të. Më lart të renditurit në nivel ndërkombëtar janë Norvegjia, Islanda dhe Suedia, ndërsa Koreja e Veriut renditet në vendin e 167-të ose të fundit në Indeksin e Demokracisë Globale.
Revista “Economist” e përshkroi vitin 2020 si një vit shumë të keq për demokracinë globale në botë, si rezultat i pandemisë Covid-19, e cila vitin e kaluar shkaktoi rënien e lirive demokratike në të gjithë botën.
Sidoqoftë, në skenën e brendshme politike, partive politike nuk iu munguan akuzat midis njëra-tjetrës për renditjen e vendit në Indeksin Global të Demokracisë për vitin 2020.
Kryetari i VMRO-DPMNE-së Hristian Mickoski deklaroi se “Ekonomist” tregon se Maqedonia është regjim hibrid dhe është gozhduar bindshëm në fund. Ai shtoi se sipas parametrave të “Transparency International”, “Heritage” Foundation dhe “The Economist” nuk do të ketë investime në vend, pasi askush nuk ka dashur të investojë në një vend të korruptuar dhe në të cilin qeveris një regjim hibrid.
Ndryshe prej kualifikimeve të tilla nga partia opozitare, LSDM thotë se raporti i “The Economist” shënon lavdërime për zgjedhjet e suksesshme në kohë pandemie, përderisa momentet negative janë për shkak të kufizimeve të ashpra ndaj pandemisë dhe sjelljes së papërgjegjshme të kuadrove të VMRO-DPMNE-së në qeverinë paraprake të vitit të kaluar.
“Për dy vjet me radhë, vendi ka bërë progres në Indeksin pasi biente ndjeshëm për 10 vjet me radhë dhe për vitin 2020 ka momente të lehta negative, të cilat janë për dy arsye, përkatësisht për shkak të kufizimeve që ishin sigurisht të nevojshme gjatë pandemisë dhe krizë shëndetësore, si dhe për shkak të mungesës së progresit në kulturën politike, e cila është kryesisht për shkak të lajmeve të rreme, radikalizmit politik, vetë-qeverisjes dhe mosndëshkimit për të cilat ka fajtorë të njohur publikisht”, deklaroi partia në pushtet LSDM.
Social Demokratët shtojnë se pas një periudhe të gjatë, në vitin 2018 dhe 2019, renditja e Maqedonisë së Veriut në Indeksin Ekonomist të Demokracisë është përmirësuar, pasi 10 viteve të kaluara stagnimi dhe rënie, ndërsa vendi u kualifikua si “regjim hibrid”.
Ndërkohë, një javë më parë, Transparency International, publikoi indeksin e korrupsionit, në të cilën Maqedonia e Veriut ishte renditur më keq se kurrë ndonjëherë deri tani, me rënie prej 5 vendesh, gjegjësisht në vendin e 111 në një grup me BeH, Panamanë dhe Mongolinë. Pra, nga ç’mund të shihet në indekset edhe të Transparency-s edhe të The Economist, Maqedonia e Veriut ndodhet në grupin e ngjashëm me Bosnjë dhe Hercegovinën sa i përke vendeve të Ballkanit Perendimor.
