Shilegov: Kompleksi Treska është projekt shtetëror dhe ky është fillim për kthimin e tij te qytetarët

F. I. 12:43, 23-01-2021

rrënimi Iobjekteve pranë Liqenit Treska — Foto nga Portalb.mk/Arbnora Memeti

Kryetari i Qytetit të Shkupit Petre Shilegov në edicionin e sotëm të 360 Grade ka folur për rastin me qendrën rekreative Treska. Ai thotë se për fat të keq, ingerencat e Komunës së Sarajit për liqenin ZTreska dhe rrethinën janë dhënë me vendim të Këshillit të Qytetit të Shkupit diku në vitin 2011 në kohën e VMRO-DPMNE-së, ndërsa në prill të vitit 2017, ata kanë tentuar t’i japin vlerë kësaj qendre rekreative që të jetë me interes shtetëror, njofton Portalb.

“Qeveria që në vitin 2017 vendosi që ky vend të bëhet zonë turistike, ndërsa obligim mori Komuna e Sarajit, që të sjellë plan të detajuar urbanistik dhe të hyhet në realizim. Ai u soll dhe me siguri ajo që tani po ndodh në terren është implementimi”, thotë Shilegov.

Thekson se kur duhet të punohet projekti në të cilin është ngushtë e përfshirë bashkësia nevojitet të ftohen ata persona dhe t’u shpjegohet se çka po ndodh saktësisht. Ai shton se tani “Treska” është me inetres shtetëror dhe as ai si kryetar i Qytetit të Shkupit, e as Blerim Bexheti si kryetar i Komunës së Sarajit, nuk munden vetë të operojnë me këtë sistem.

“Ajo çfarë po ndodh atje, supozoj, janë nga fundi edhe bisedimet me investitorët dhe kjo në njëfarë mënyrë është fillim i kthimit”, tha Shilegov duke iu përgjigjur pyetjes rreth premtimit të tij nga zgjedhjet lokale në vitin 2017 se “Treska”-n do ta kthejë në kompetencë të Qytetit të Shkupit dhe qytetarëve.

Lidhur me kritikat e opozitares VMRO-DPMNE dhe thirrjeve ndaj tij që ta zgjidh problemin me këtë rast, Shilegov thotë se është hipokrizi që ai që e ka krijuar problemin tani të thirrë dikë tjetër për përgjegjësi.

“Është hipokrizi që më thirrin mua si kryetar i Qytetit të Shkupit, ndërsa ata e kanë krijuar problemi para 11 viteve”, shtoi Shilegov.

Komuna e Sarajit filloi me rrënimin e objekteve dhe përmbajtjeve në Liqenin e Treskës. Me mekanizim ndërtimor largohen shtëpizat, kafenetë, restorantet, pishinat, tualetet tani më të shkatërruar, të cilat para dyzetë viteve ishin ndërtuar me vetë-kontribut të qytetarëve, njofton Portalb.mk.

Me rrënimin e infrastrukturës, Komuna e Sarajit fillon me procedurën e realizimit të Planit detajuar urbanistik (PDU), përkatësisht me ndërtim të komplekseve hotelerike dhe vikend lagjes. Para vitit të ri, komuna u caktoi afat pronarëve të kampeve që të zhvendoseshin nga liqeni. Por këta të fundit u shprehën të vendosur që të mos largohen prej aty, gjë që e kërkon Komuna e Sarajit, me arsyetimin se vendi do të revitalizohet. Megjithatë, atë e shohin këtë si tentim që komuna ta uzurpojë këtë vend turistik. Ata u kanë bërë thirrje shoqatave qytetare, organizatave joqeveritare, avokatëve që t’i mbështesin në këtë luftë.

Nga ana tjetër, edhe kryetari i Komunës së Sarajit, Blerim Bexheti ishte shprehur i vendosur në realizimin deri në fund të vendimit të tij. Ai deklaroi për mediat se janë të njoftuar që t’i largojnë kampet, pasi komuna Saraj dhe Këshilli i Komunës kanë plan urbanistik që ndodhet në kadastër.

“Inspektori ynë i mjedisit jetësor në vendin ku janë vendosur kampet ka konstatuar që nuk ka kushte adekuate. Nuk respektohen rregullat, shumë prej tyre janë të rrethuara dhe mbi ndërtuara. Nuk mund ata që janë qiraxhi të jenë pengesë për realizimin e planit dhe ngjalljes së serishme të këtij simboli të Shkupit. Në të njëjtën kohë, pasi e miratuam planin e ri urbanistik, të premten parashtruam kërkesë me shkrim në Qeveri për ta shpallur liqenin e Treskës për zonë të lirë turistike, me çka do të mund të kërkojmë investitorë që do ta ngjallin dhe rregullojnë hapësirën”, deklaroi Bexheti.

Bexheti atëherë paralajmëroi që do të mbajë pres konferencë tematike në të cilën, publikut do t’i prezantojë se çfarë parashihet me Planin e ri të detajuar urbanistik, i cili do të ndërtohet në liqenin Treska, mirëpo kjo ende nuk ka ndodhur.

Komuna e Sarajit kishte kërkuar nga Qeveria që të shpallë liqenin e Treskës për zonë të lirë turistike dhe të largohen kampet e vendosura rreth liqenit.

Qeveria e udhëhequr nga LSDM-ja vitin e kaluar, një pjesë të tokës bujqësore në fshatrat Gllumovë dhe Shishevë, që gjendet rreth liqenit, e ridedikoi në tokë ndërtimore që të mund Komuna e Sarajit të përgatisë Plan të detajuar urbanistik. Atëherë nga Qeveria deklaruan që ky vendim është miratuar që të mund në këtë pjesë të periferisë së kryeqytetit të shënohen pulla dhe të ndërtohet vikend-lagje, kompleks hotelerik dhe qendër rekreative sportive për zhvillim të eko-turizmit, me çka njëkohësisht do të kthehet në funksion edhe liqeni.

Revitalizimi i Liqenit të Treskës, është një projekt i shumë premtuar për vite të tëra nga ana e kryetarëve të kësaj komune. Liqeni artificial i Treskës, me sipërfaqe 136.000 metra në katror, thellësi nga 1.6 m deri në 3 metra dhe kapacitet për 10.000 notues, në vitet 1980-1990 ka funksionuar kryesisht si vend për piknik për shkupjanët, veçanërisht në muajt e verës.. Ky kompleks rekreativë është ndërtuar në vitin 1978. Në hapjen solemne të këtij vendi turistik mori pjesë edhe kreu i ish shtetit të Jugosllavisë Josip Broz Tito. Rreth liqenit dikur, ka pasur shtëpiza, kafene, restorante, pishina, garderoba, tualete, terrene sporti si dhe kampe për rimorkio. Liqeni Treska jetoi vetëm 20 vite. Në vitin 1998, për shkak të ndotjes së ujit u mbyll për t’u pastruar dhe që atëherë filloi shkatërrimi i tij. Sot, njëzet vite pasi është mbyllur, kompleksi rreth liqenit është tërësisht i shkatërruar.