Sela për interpelancën ndaj Dimitrovit: Si parti opozitare do ta mbështesim iniciativën
Në pyetjen për interpelancën për zëvendëskryeministrin për çështje evropiane, Nikolla Dimitrov, lideri i Aleancës për Shqiptarët, Ziadin Sela në debatin për TV 21, tha se si opozitë do të mbështesin çdo iniciativë për interpelancë, transmeton Portalb.mk.
“Është jo normale të mos votojë për interpelancë të ngritur nga një parti opozitare. Ne jemi parti opozitare dhe do të duhej ta mbështesim çdo iniciativë për interpelancë”, deklaroi Sela.
Dje partia opozitare VMRO – DPMNE ka ngritur interpelancë për zëvendëskryeministrin për çështje evropiane, Nikolla Dimitrov. Si arsye të parë deputetët e VMRO – DPMNE-së e theksojnë raportin e Dimitrovit ndaj Kuvendit, përkatësisht se edhe përkrah obligimit kushtetues se një anëtar i Qeveri përgjigjet për punën e vet para Kuvendit, zëvendëskryeministri ka refuzuar dy herë ftesat që të merr pjesë në seancë të Komisionit për Punë të Jashtme në lidhje me raportet maqedono – bullgare.
Nga LSDM janë përgjigjur se interpelanca do të jetë disfatë e re për VMRO – DPMNE-në dhe Hristijan Mickoskin. Socialdemokratët vlerësojnë se kjo është vetëm vazhdimësi e destruktivitetit dhe dëshpërimit të partisë opozitare.
