Riciklohet premtimi për linjën e interkonjeksionit Shqipëri-Maqedoni, që duhej të ishte gati në vitin 2018
Shqipëria dhe Maqedonia e Veriut ishin angazhuar për ndërtimin linjës së interkonjeksionit 400 kV që në vitin 2015 dhe zbatimi i projektit duhej të kishte përfunduar në 2018-n. Projekti jo vetëm që nuk është realizuar por ai është risjellë si premtim nga ministrja aktuale e energjisë, Belinda Balluku, shkruan Faktoje.al, transmeton Portalb.mk.
Më 11dhjetor të vitit 2015 Ministri i Energjisë dhe Industrisë Damian Gjiknuri dhe Ministri atëhershëm i Ekonomisë së Maqedonisë së Veriut Bekim Neziri, firmosën në takimin e mbajtur në qytetin e Strugës, Memorandumin për Bashkëpunim në Sektorin e Energjisë.
Ata theksuan kushtet e favorshme të të dy vendeve për zgjerimin e bashkëpunimit në energji, duke shfrytëzuar pozicionin gjeografik, por edhe marrëdhëniet tradicionale mes tyre. Shqipëria dhe Maqedonia, sipas nënshkruesve e ishin të garantuar financimin dhe brenda vitit 2017 do të fillonte ndërtimi i linjës së interkonjeksionit 400 kilovoltëshe Elbasan-Manastir.
“Projekti është duke ecur me të njëjtin ritëm në të dyja anët e kufirit. Besoj se deri në vitin 2017 do të fillojë ndërtimi konkret i kësaj linje, për t’u vënë në funksion në vitin 2018. Mjetet financiare për realizimin e këtij projekti janë siguruar nga të dyja shtetet, ndaj projekti do të marrë vetëm kohën e tij për t’u kompletuar”- u shpreh Gjiknuri.
Çfarë është bërë 5 vite pas kësaj deklarate?
“Faktoje” vendosi të komunikojë me Ministrinë e Energjisë dhe Infrastrukturës për të mësuar se çfarë është bërë me linjën e interkonjeksionit.
Në përgjigjen e kthyer nga Operatori i Sistemit të Shpërndarjes, nga kjo media mësuan se projekti është ende në fazën e tenderimit.
Në hapin e radhës Faktoje u përpoq të kontaktojë me palën maqedonase të cilës i dërguan dy kërkesa për informacion, përktësisht Ministrisë së Financave dhe Ministrisë së Transportit të Maqedonisë së Veriut.
Ka kaluar një muaj nga data e dërgimit të këtyre kërkesave dhe ende nuk ka përgjigje nga pala e Maqedonisë së Veriut.
Hapi i radhës që Faktoje ndoqi ishte kontrolli në terren. Ata udhëtuan në Elbasan, por nuk gjetën asnjë pikë të re për ndërtimin e linjës së interkonjeksionit 400 kV. E vetmja pikë ishte nënsatcioni ekzistues i energjisë elektrike të qytetit të Elbasanit.
Nga kërkimet e mëtejshme për ndërtimin e kësaj linje, u gjet edhe një deklaratë e artikuluar publikisht nga Ministja aktuale e Energjisë dhe Transportit Belinda Balluku, e cila njofton se projekti i radhës do të jetë linja Elbasan-Manastir, i njëjti që u premtua në 2015-n, nga paraardhësi i saj Damian Gjiknuri dhe që sipas atij zotimi duhej të ishte vënë në funksion.
