Kuvendi zgjodhi Dobrilla Kacarskën gjykatëse të Gjykatës Kushtetuese

Me 61 vota “për”, Kuvendi dje zgjodhi Dobrilla Kacarskën për gjykatëse të re në Gjykatën Kushtetuese. Ajo para deputetëve mbajti fjalimin e saj duke nënvizuar se do ta kryejë punën me ndershmëri dhe se do ta respektojë Kushtetutën, njofton Portalb.mk.

Mandati i saj do të zgjasë 9 vjet, ndërsa ajo zëvendëson gjyqtarin aktual kushtetues Vladimir Stojanovski, mandati i të cilit skadoi në prill të këtij viti. Me zgjedhjen e Kacarskës, është kompletuar përbërja e Gjykatës Kushtetuese.

Partia opozitare VMRO-DPMNE kundërshtoi ashpër zgjedhjen e Dobrilla Kacarskës për gjykatëse kushtetuese dhe nuk mori pjesë në votimin parlamentar. Debati para zgjedhjes së gjyqtares së re kushtetuese u zhvillua në një atmosferë shumë të zhurmshme, për shkak të kundërshtimit të opozitës për zgjedhjen e saj.

Dobrilla Kacarska është një gjyqtare me përvojë 30 vjeçare, e cila ka gjykuar çështje si nga fusha penale, ashtu edhe nga ajo civile. Në pozitën e gjyatëses kushtetuese vjen nga Gjykata Themelore Penale në Shkup, ku ajo ka qenë gjyqtare për krim të organizuar.