U arrit marrëveshje, Nagorno-Karabaku i mbetet Azerbejxhanit, protestuesit armen sulmojnë parlamentin (VIDEO)
Protestuesit sulmuan ndërtesat qeveritare në Jerevan pasi Armenia, Azerbajxhani dhe Rusia nënshkruan një marrëveshje për t’i dhënë fund konfliktit ushtarak në rajonin e diskutueshëm Nagorno-Karabak. Kryeministri armen Nikole Pashinia e përshkroi marrëveshjen si “jashtëzakonisht të dhimbshme për të dhe njerëzit e tij”, duke shtuar se e kishte nënshkruar atë me këmbënguljen e ushtrisë, njofton Portalb.mk.
Luftimet në Nagorno-Karabak rifilluan gjashtë javë më parë, duke vrarë mijëra dhe duke zhvendosur 100,000 të tjerë. Ky territor është pjesë e Azerbajxhanit, por është nën kontrollin e armenëve etnikë.
Rusia sot filloi vendosjen e paqeruajtësve të saj përgjatë vijës së frontit. Ata do të formojnë një korridor midis rajonit dhe Armenisë dhe janë planifikuar të qëndrojnë atje për pesë vjet.
“Marrëveshja e nënshkruar do të jetë një pikë kyçe për zgjidhjen e përhershme të konfliktit,” tha Presidenti i Azerbajxhanit Ilham Alijev.
Sipas marrëveshjes, Azerbajxhani do të mbajë territoret që ka përvetësuar në të kaluarën, duke përfshirë qytetin e dytë më të madh të enklavës, Shusha, kurse forcat armene duhet të tërhiqen edhe nga disa rajone të tjerë deri në 1 dhjetor.