Apeli për lëndën e Almirit: Aktgjykimi është ndryshuar, Iliqit i është ulur dënimi prej 6 në 4 vjet burg
Gjykata e Apelit, sot edhe zyrtarisht e konfirmoi për Portalb.mk se e kanë ndryshuar vendimin e shkallës së parë për lëndën “Almir Aliu”, me të cilën Boban Iliqit, i cili e ka shtypur për vdekje me makinë vogëlushin 4-vjeçar nga Kumanova, i është ulur dënimi prej 6 vjet në 4 vjet burg, ndërkaq pjesa tjetër e vendimit mbetet e njëjtë, gjegjësisht Babai i Almirit me 6 muaj, ndërkaq dy familjarët e tjerë me nga 9 muaj burg njofton Portalb.mk.
Vendimin për të lëndën, nga Apeli thonë se do ta publikojnë në ditët në vijim.
Me këtë vendim, familjarët e vogëlushit të ndjerë, nuk kanë të drejtë të ankohen para Gjykatës Supreme për aktgjykimin e Gjykatës së Apelit, për shkak se dënimi i tyre me burg është më i vogël se 1 vjet. Për dallim prej tyre, Iliq, nëse dëshiron mund të ankohet në Supreme.
“Nëse personi i cili është dënuar me dënim me burg pa kusht ose burg për të mitur prej së paku një vjet mbrojtësi i tij mund të dorëzojë kërkesë për rishqyrtim të jashtëzakonshëm të aktgjykimit të plotfuqishëm për shkak të shkeljes së ligjit në rastet e parashikuara me këtë ligj”, thotë neni 463, paragrafi 1.
Në këtë rast, familjarët e Almirit kanë të drejtë drejtësi të kërkojnë në Gjykatën Ndërkombëtare për të Drejtat e Njeriut në Strasburg.
Rasti Almir Aliu
Në korrik të vitit 2016-të, vogëlushi nga Kumanova Almiri, u shkel me makinë nga Iliq, pasi që paraprakisht babai i vogëlushit dhe ai kishin pasur një zënkë banale në ambulancë.
Fillimisht, Iliq ndiqej për veprën “vrasje me paramendim“, megjithatë e njëjta më pas u rikualifikua nga Prokuroria duke e ndjekur për veprën penale “vepra të rënda kundër sigurisë së njerëzve dhe pronës në komunikacion” nga neni 300 paragrafi 2 në lidhje me nenin 297 paragrafi 1 nga Kodi Penal”.
Për rastin në fjalë ka pasur reagime të ashpra në opinion, duke organizuar protesta masive nga qytetarët të cilët e dënuan aktin e Prokurorisë, për shkak të rikualifikimit të lëndës.
Gjatë gjykimit, pati reagime në lidhje me atë se janë bërë lëshime gjatë procedurës, gjegjësisht janë marrë për dëshmi ekspertizat neuropsikiatrike të ekspertëve me licenca me afate të skaduara. Pos kësaj, edhe pse në kamerat e sigurisë shihet qartë se vëllai i Bobanit, Bojan Iliq, ka qenë i përfshirë në rrahjen me Sedat Aliun, Sami Demirin dhe Abdulla Aliun, ai nuk u përfshi në akuzë, gjegjësisht nuk u dënua.
Më 5 prill të vitit 2018, Boban Iliq, u dënua me 6 vjet burg, babai i Almirit, Sedat Aliu me 6 muaj, ndërkaq Sami Demiri dhe Abdullah Aliu me nga 9 muaj burg. I njëjti vendim u rikonfirmua në rigjykimin e dytë.
Lënda shkoi në Gjykatën e Apelit, e cila e ktheu prej në nga e para për shkak të shkeljeve që ishin bërë në procedurë. Gjykata Themelore e Kumanovës sërish me të njëjtat dënime i dënoi të akuzuarit. Lënda shkoi sërish në Apel, ku tani kjo Gjykatë ndërroi mendje dhe për dallim prej herës së parë, Iliqit ia uli dënimin prej 6 në 4 vjet..
