fbpx

Presidenti slloven, Pahor: Vizita ime në Shkup sot nuk është e rastësishme

Presidenti i Sllovenisë, Borut Pahor po qëndron për vizitë zyrtare në Maqedoninë e Veriut, gjatë së cilës u takua me presidentin e vendit, Stevo Pendarovski, raporton Anadolu Agency (AA).

Pahor u prit me nderimet më të larta shtetërore dhe ushtarake nga Pendarovski para kabinetit të presidentit në “Villa Vodno”.

Të dy presidentët patën një takim tet-a-tet dhe më pas vazhduan në një takim plenar të delegacioneve zyrtare të të dy vendeve, pasuar nga një konferencë e përbashkët për media.

Presidenti i Maqedonisë së Veriut, Stevo Pendarovski deklaroi se Pahor është burrështetasi i parë që viziton vendin gjatë pandemisë së COVID-19, e cila sipas tij, dëshmon miqësinë strategjike dhe afërsinë tradicionale midis dy vendeve.

“Sllovenia është aleatja jonë në NATO ndërsa ndihma në zbatimin e reformave të mbrojtjes si dhe bashkëpunimi midis dy ushtrive tona ishte dhe vazhdon të ketë një rëndësi të jashtëzakonshme. Në fushën e ekonomisë, Sllovenia ka qenë partneri dhe investitori ynë i rëndësishëm tregtar për vite me radhë. Pavarësisht shkëmbimit të reduktuar tregtar këtë vit për shkak të krizës, tregtia karakterizohet nga një rritje e qëndrueshme”, tha Pendarovski.

Ai tha se detyra e tyre është të rrisin eksportet e tyre në Slloveni dhe të kompensojnë deficitin tregtar.

Pendarovski potencoi se mbështetjen e Sllovenisë e morën edhe në trajtimin e përhapjes së koronavirusit dhe se për një kohë të gjatë tani, policia sllovene ka punuar me oficerë të policisë së Maqedonisë së Veriut në kufirin jugor për t’u marrë me krizën e migrantëve dhe refugjatëve e cila zgjat prej disa kohësh.

“Marrëdhëniet tona dypalëshe i pasurojnë edhe shkencëtarët dhe artistët tanë të cilët studiojnë dhe mësojnë gjuhët dhe kulturën tonë dhe arrijnë shkëmbim intensiv kulturor si dhe qytetarët tanë, sllovenët në Maqedoninë e Veriut dhe maqedonasit në Slloveni të cilët ndërtojnë arsimimin e tyre këtu dhe atje, karrierë e tyre, krijojnë familje dhe kështu formojnë lidhje të pashkëputshme midis dy shoqërive dhe kulturave tona”, tha Pendarovski.

Ai shtoi se kanë një të kaluar pozitive edhe si pjesë e ish-shtetit, duke ndarë një të tashme të përbashkët si aleatë të NATO-s, duke shprehur besim të thellë se do të kenë një të ardhme të përbashkët si pjesë e BE-së.

“Sllovenia mbështeti pa rezerva vendimin e Këshillit Evropian në mars të këtij viti për çeljen e bisedimeve për anëtarësimin tonë në BE dhe tani na mbështet në synimin tonë për të mbajtur konferencën e parë ndërqeveritare deri në fund të këtij viti”, tha ai.

Pendarovski nënvizoi se me Pahor diskutuan sigurinë dhe bashkëpunimin rajonal si dhe zhvillimin aktual të mundësive politike në rajon dhe se arritën në përfundimin se e ardhmja e rajonit është plotësisht në integrimin e BE-së dhe se nuk ka asnjë alternativë tjetër për këtë orientim strategjik.

Presidenti i Maqedonisë së Veriut shprehu shpresë dhe pritje se bashkëpunimi i suksesshëm midis dy vendeve do të vazhdojë dhe miqësia maqedono-sllovene do të bëhet edhe më e fortë.

– “Vizita ime në Shkup sot nuk është e rastësishme”

Presidenti i Sllovenisë, Borut Pahor deklaroi se Sllovenia dhe Maqedonia e Veriut janë mike dhe aleate tradicionale, duke theksuar se pas bllokadës së gjatë të Greqisë, politikat e të dy vendeve ishin në gjendje të gjenin një kompromis që më në fund hoqi bllokadën e Greqisë fqinje për afrimin e Maqedonisë së Veriut drejt NATO-s dhe Bashkimit Evropian (BE).

“Vizita ime sot në Shkup nuk është e rastësishme. Koha e kësaj vizite nuk është e rastësishme. E zgjodha, sepse si president i një prej 27 vendeve unë do të doja të theksoja se tani është një mundësi reale për të mos vonuar fillimin e konferencës kryesore të Qeverisë së Republikës së Maqedonisë së Veriut me Komisionin Evropian”, tha Pahor.

Sipas tij, ai e kupton se disa vende fqinje kanë hezitime shtesë dhe kjo është arsyeja, tha ai, që dëshiron të theksoj haptas se tani është koha e duhur që 27 vendet anëtare të BE-së të bëjnë gjithçka që konferenca ndërqeveritare të fillojë me të vërtetë pa vonesa.

“Sllovenia është mike e Maqedonisë së Veriut dhe mike e Bullgarisë gjithashtu. Ne e kuptojmë kompleksitetin e të gjitha çështjeve por kur vlerësojmë situatën e përgjithshme duhet të them një gjë; nëse konferenca ndërqeveritare shtyhet, do të ketë disa inerci që mund të zgjasin për një kohë të gjatë dhe të rrezikojnë seriozisht interesat e Republikës së Maqedonisë së Veriut, rajonit dhe të gjitha vendeve të BE-së”, tha ai.

Pahor theksoi se kjo është arsyeja pse ne duhet të gjejmë të gjitha mënyrat e mundshme që ajo konferencë ndërqeveritare të fillojë pa vonesë përmes kanaleve të qeta diplomatike dhe hapur në nivelin e BE-së midis vendeve, të potencojmë se kjo është shumë e rëndësishme.

“Republika e Maqedonisë së Veriut ka bërë aq shumë për të përmbushur të gjitha kushtet e vendosura nga BE-ja, kështu që do të ishte e pandershme nëse do të ketë tani dikush në BE që do të dëshirojë të shtyjë bisedimet dypalëshe midis Republikës së Maqedonisë së Veriut dhe BE-së”, tha presidenti slloven.

Tags

Lajme të ngjashme

Leave a Reply

Your email address will not be published. Required fields are marked *

Back to top button
Close