fbpx

“Monstra”, Aziri e demantoi inspektorin e Policisë që mohonte dhunën ndaj familjarëve gjatë bastisjes

Në seancë gjyqësorë sot ka dhënë dëshmi, Goranço Veselinov, inspektori policor i MPB-së në sektorin e Krimit të Dhunshëm, i cili ka qenë përgjegjës për bastisjen në shtëpinë e Haki Azirit, por edhe ka bërë bisedë fillestare. Ai mohoi të kenë përdorur dhunë, por Aziri e demantoi, njofton Portalb.mk.

Veselinov fillimisht i ngatërroi Haki Azirin me Agim Ismailoviqin, dhe tha se prej rastit të gjithë i njeh. Inspektorit nuk i kujtohej edhe nëse ka kryer bisedë me Azirin pasi që është arrestuar, por tha se “nëse kam kryer ka qenë për informata të përgjithshme”.

Inspektori mohoi se policia gjatë bastisjes ka përdorur dhunë dhe i ka keqtrajtuar familjarët,

“I njoh nga hetimi, se di te cili saktësisht kam bërë bastisje. Nuk kemi përdorur dhunë gjatë bastisjes, sipas procedurës, u kemi vënë pranga dhe më pas ua kemi sqaruar të drejtat”, tha inspektori Veselinov.

Haki Aziri, i cili më herët ka deklaruar se ka qenë i keqtrajtuar nga Policia për të pranuar që të jetë dëshmitar i fshehtë për t’i akuzuar të tjerët për kryerjen e vrasjes, e pyeti inspektorin nëse gjatë bastisjes së shtëpisë është thirrur ndihma e shpejtë dhe pse e njëjta nuk është cekur në proces verbal.

“Jam goditur me shqelm, gjithashtu edhe vëllai im 15-vjeçar, babai im. Përse nuk është përmendur në procesverbal se është thirrur ndihma e shpejtë”, tha Aziri.

Ndaj kësaj reagoi edhe gjykatësi Osman Shabani, i cili ia risqaroi pyetjen inspektorit, i cili paraprakisht theksoi se të gjitha veprimet e ndërmarra gjatë bastisjes janë në procesverbal.

Inspektori theksoi se kjo nuk është përfshirë në procesverbal, pasi që është në procesverbalin e Ndihmës së Shpejtë.

“Monstra”

Alil Demiri, vëllezërit Afrim dhe Agim Ismailoviq, Fejzi Haziri, Haki Haziri dhe Sami Luta, janë dënuar me burg të përjetshëm për rastin “Monstra”, nën akuzën se e kanë kryer vrasjen e pesëfishtë në Liqenin e Smillkovës.

Vendimi për gjashtë të akuzuarit e rastit Monstra, acaroi shumë qytetarët dhe juristët të cilët vlerësojnë se nuk kishte prova te mjaftueshme për t’i shpallë ata fajtorë dhe të ju shqiptohet dënim me burg të përjetshëm. Ky rast shkaktoi bujë të madhe në Maqedoni, sidomos te popullata shqiptare duke u organizuar edhe protesta masive një muaj me radhë. Edhe pse disa herë u përfol në opinion nga lideri i LSDM-së, se ka material të përgjuar për rastin “Monstra”, megjithatë nga “bombat” e publikuara, për këtë të fundit nuk nxori asgjë.

Gjykata Supreme më 24 nëntor të vitit 2017 solli vendim që lënda “Monstra” të shkojë në ri-gjykim, ndërkaq të dënuarit, Sami Luta, Haki Aziri, Agim Ismailloviq dhe Fejzi Aziri të lirohen nga burgu nën masa të kujdesit, gjegjësisht të mos lejohen që ta lëshojnë qytetin e Shkupit dhe të paraqiten te personi zyrtar në Gjykatën Themelore Shkupi 1 çdo të martë dhe të premte në periudhën prej orës 12 deri në orën 14”.

Prej këtyre katër personave, vetëm Fejzi Aziri është ende në burg pasi që akuzohet edhe për një rast tjetër për të cilën i është shqiptuar masa e dënimit prej 6 vjet e gjysmë, gjegjësisht për gjuajte në fermën “Belimbegovë”.

Alil Demiri dhe Afrim Ismailoviq
Alil Demiri dhe Afrim Ismailoviq

Momentalisht, në arrati gjenden edhe dy të akuzuarit Afrim Ismailoviq dhe Alil Demiri, të cilët momentalisht janë në Kosovë. Gjatë vitit të kaluar, Gjykata e Krimeve në Prishtinë ka liruar nga burgu.  Lirimi nga akuza si të pafajshëm i dy të dënuarve, të cilët në Maqedoni janë dënuar me burgim të përjetshëm, ka ardhur pasi Trupi Gjykues i Gjykatës në Prishtinë ka konstatuar se argumentet e Prokurorisë në Maqedoni nuk mbajnë.

Afrim Ismailoviq dhe Alil Demiri ishin arrestuar mars të vitit 2013, në një banesë në rrugën “Mehmet Gradica” të Prishtinës, ndërsa i kanë thënë prokurorisë se kanë banuar me qira nëpër banesa të ndryshme që nga koha e arratisjes prej Maqedonisë në vitin 2012. Banesat, ata i kanë kërkuar dhe gjetur nëpërmjet internetit.

Për të njëjtët, Ministria e Drejtësisë ka filluar procedurë për ekstradim, por autoritetet kosovare ende nuk i kanë ekstraduar.

Tags

Lajme të ngjashme

Leave a Reply

Your email address will not be published. Required fields are marked *

Back to top button
Close