Antikorrupsioni heton nëse ndihma për gruper.mk ishte dhënë ligjërisht

Komisioni Antikorrupsion është duke punuar në grupin e parë të masave të qeverisë për të ndihmuar kompanitë e prekura nga kriza e koronës, përfshirë atë që e ka pranuar kompania në të cilën tani ish-ministrja e financave Nina Angellovska është bashkëpronar. Është thelbësore se sipas cilave kritere është dhënë ndihma, thonë nga Komisioni Antikorrupsion për REL.

Një total prej 11 mijë eurosh për tre muaj, shteti ka paguar ndihmë për pagimin e pagave kompanisë Vebspot SHPK, tregojnë të dhënat nga vegla për transparencë “Financa të hapura”. Sidoqoftë, vëmendja e publikut ndaj kësaj kompanie u tërhoq nga fakti se një nga pronarët e kësaj kompanie është ish-ministrja e financave në qeverinë e LSDM-së Nina Angellovska e cila u kujdes për shpërndarjen e buxhetit të shtetit.

Sipas të dhënave nga Regjistri Qendror, Angellovska në këtë kompani figuron si një nga tre pronarët dhe themeluesit e platformës për onlajn tregti – grupper.mk me pjesëmarrje në investimin themelues prej 2600 euro. Një nga partnerët e tij, Martin Kitanovski, është regjistruar si menaxher i ndërmarrjes në dokumentin e Regjistrit qendror.

Komisioni Antikorrupsion për REL thotë se është hapur një lëndë në të cilën po hetohen mënyrat, përkatësisht kriteret sipas të cilave u është dhënë ndihma ekonomike për pagimin e pagave për ndërmarrjet. Bëhet fjalë për pakon e parë e masave, ku përfshihet pagesa e këtyre 11 mijë eurove për kompaninë në të cilën njëri nga pronarët është ministrja e deritanishme. Nga Antikorrupsioni thonë që në hulumtimet e tyre vëmendje e veçantë i kushtohet kritereve sipas të cilave janë  ndarë masat për ndihmë në pagesën e pagave.

Kriteret do të tregojnë nëse dhënia e ndihmës është e arsyeshme, përkatësisht nëse kompania për onlajn tregti kishte nevojë reale për ndihmë të tillë, ose e kishte marrë atë për arsye të tjera të pabazuara, shpjegojnë ata. Ky është synimi i dytë, pra një zyrtar i lartë për të cilin Zyra Antikorrupsion hap një procedurë për pjesën e dhënies së grupit të parë të masave ekonomike. E njëjta çështje po hetohet për kompaninë në të cilën ish-zëvendës kryeministri Koço Angjushev është pjesë e strukturës së pronësisë “Brako”, e cila gjithashtu përdori disa nga këto masa.

Kompania Vebspot thotë se ata gjithmonë kanë funksionuar në përputhje me rregullat ligjore. Prandaj, thonë se e kanë respektuar atë parim të funksionimit në lidhje me aplikimin e masës për pagimin e pagave.

“Gjegjësisht, mbështetja financiare për pagimin e pagave të punëtorëve ishte masë e kushtëzuar dhe jo-selektive anti-krizë që zbatohej për të gjitha kompanitë që plotësojnë kushtet e shpallura publikisht,” thuhet në përgjigjen me shkrim për REL.

Aty theksohet se kompania kishte nevojë për ndihmë të tillë sepse nuk ishte një masë për të cilën kishte një konkurs dhe ata aplikuan, por një masë për të cilën kompania i plotëson kushtet për të paguar pagat e punonjësve.

“Kompania po përballej me një rënie të ndjeshme të të ardhurave, duke pasur parasysh se shumica e të ardhurave vinin nga shitja e shërbimeve nga sektorë që ishin më të prekurit nga masat kufizuese të qeverisë. Vendet e punës së punonjësve në kompaninë tonë janë po aq të rëndësishme sa të gjitha punët në çdo kompani dhe ruajtja e tyre dhe pagesa e pagës nuk është më pak e rëndësishme nëse njëri nga bashkëpronarët do të ishte mbajtës i funksionit publik”, thuhet në përgjigjen me shkrim.

Ata shtojnë që, ashtu si vlejnë kushtet për secilën kompani, nëse kompania arrin një rezultat pozitiv këtë vit, mbështetja e marrë do të kthehet. Kërkesa për këtë masë nënshkruhet nga kontabilisti i kompanisë.

Sipas dekretit për këtë masë ekonomike të publikuar në Gazetën Zyrtare, punëdhënësi e dërgon kërkesën në Zyrën e të Ardhurave Publike, e cila më vonë ia dërgon atë Sekretariatit të Përgjithshëm të Qeverisë, që është nënshkruesi i miratimeve.

Angellovska erdhi si Ministre e Financave pasi Kryeministri Zoran Zaev në emër të “fshesës së partisë” pas zgjedhjeve presidenciale të vitit 2019 zëvendësoi paraardhësin e saj Dragan Tevdovski.

Opozita akuzon ministren për abuzim me pozitën e saj dhe pagimin e ndihmës shtetërore vetes.

“Ekzistojnë dyshime serioze se Angellovska ka abuzuar sërish me pozitën e saj dhe nga buxheti i shtetit, për të cilin ajo ishte e ngarkuar të administronte, ajo pagoi ndihmë shtetërore për kompaninë e saj për pagat gjatë epidemisë”, tha zëdhënësi i VMRO-DPMNE Naum Stoilkovski.

Foto nga baza e të dhënave “Financa të hapura“

Kompania Vebspot e cila është themeluese e platformës për onlajn tregti druper.mk dhe në të cilën një e treta e strukturës së pronësisë i takon Angellovskës më 08.07.2020 nga shteti ka marrë 210.909 denarë, më parë me 12.06.2020 ka marrë 224.750 denarë dhe më 19.05.2020 ka marrë 224.750 denarë, nga ndihma e masave anti-krizë gjatë epidemisë me Kovid-19.

Sipas parimit të besimit në ligjin për mbrojtje nga korrupsioni, zyrtarët nuk duhet të përdorin ose abuzojnë me kompetencat dhe detyrat e tyre zyrtare për nevoja dhe qëllime personale.

“Një konflikt midis interesit personal dhe atij të përgjithshëm ekziston kur kryerja e një veprimi zyrtari të caktuar ose veprimi tjetër prek në interesat materiale ose interesa të tjerë të personit të përmendur në paragrafin 1 të këtij neni ose interesat e anëtarëve të familjes së tij”, thuhet në ligj.

Më parë, opozita akuzoi Angellovskën për përdorimin e informacionit që me gjasë e ka pas ndoshta për fillimin e procedurës së falimentimit të Eurostandard Bank dhe tërheqjen e parave të saj në kohë, siç tha ajo, për të blerë një apartament dhe për të investuar në fonde private të investimeve.

Gjegjësisht, sipas ligjit, një zyrtar (funksionar) nuk duhet të përdorë informacionin për përfitime personale.

Komisioni Shtetëror për Parandalim të Korrupsionit njoftoi se nuk do të vendosë sanksione ndaj ministres së deritanishme të financave Nina Angellovska në rastin e bankës Eurostandard, nga ku ajo tërhoqi kursimet e saj para shpalljes së falimentimit. Sidoqoftë, Kryetari i Komisionit Antikorrupsion Biljana Ivanovska në një konferencë për shtyp vuri në dukje se kjo çështje është problematike nga pikëpamja etike, prandaj është e nevojshme të qartësohet dhe rregullohet më tej çështja e parandalimit të konfliktit të interesit.