Raporti javor i ISHP-së: Numri më i madh i personave të infektuar me Covid – 19 janë të grupmoshës mbi 60 vjeç dhe 30-39

Ministria e Shëndetësisë ka publikuar sot raportin javor të Institutit për Shëndet Publik në lidhje me gjendjen me Covid – 19 në Maqedoninë e Veriut. Raporti tregon se, në periudhën 27 korrik – 2 gusht ka vazhduar trendi i uljes së rasteve të reja të infektuar me këtë virus ndërsa është rritur numri i personave që janë shëruar, raporton Portalb.mk.

Ministria e Shëndetësisë informoi se faktori R0 i transmetimit të virusit tregon një trend pozitiv në rënie i cili është 0.9, ndërsa për gati një muaj ka qenë rreth 1.

Sipas këtij raporti, në periudhën 27 korrik – 2 gusht, janë regjistruar 1,032 persona të shëruar të cilët janë shtruar në spital ose trajtuar në shtëpi, që është 378 persona ose 36.6 për qind më shumë se javën e kaluar raportuese (20 – 26 korrik). Ndërkohë, janë regjistruar 29 vdekje, që është një rënie prej 14.7 për qind, krahasuar me javën e kaluar.

“Vazhdon edhe trendi i uljes së numrit të rasteve të reja dhe personave të vdekur, ndërsa është shënuar edhe një rritje e konsiderueshme e numrit të personave të shëruar në krahasim me javën e kaluar, sipas raportit javor të Institutit të Shëndetit Publik të publikuar sot për periudhën nga 27 korriku deri më 2 gusht. ISHP raporton se në këtë periudhë janë kryer gjithsej 9,709 teste (146 më shumë nga periudha 20 – 26 korrik) dhe janë regjistruar 912 raste pozitive të Kovid-19 e që është 4.6 për qind më pak se javën e kaluar. Në këtë periudhë vërehet një rënie e lehtë e përqindjes së rasteve pozitive të testuara e cila është 9.4 për qind (javën e kaluar 10 për qind e të testuarve ishin pozitiv)”.

Shkupi vazhdon të regjistrojë numër më të madh të rasteve në krahasim me qytetet e tjera të vendit, edhe ka shënuar një rënie të lehtë gjatë tre javëve të fundit. Të infektuarit e rinj janë regjistruar në 28 qytete, përqindja më e madhe e të infektuarve të rinj është në Shkup (27.9 për qind), Shtip (12.2 për qind) dhe Gostivar (11.2 për qind). Në 19 qytete të vendit, për të njëjtën periudhë, numri i rasteve të konfirmuara rishtas është nën 20”, informojnë nga Ministria. Shumica e rasteve janë njerëz mbi 60 vjeç – 75.9 për qind.

“Sa i përket strukturës së moshës të të infektuarve të rinj në këtë periudhë, përqindja më e lartë janë njerëzit mbi 60 vjeç – 22.9 për qind, ndërsa një numër më i madh i pacientëve është regjistruar në mesin e personave të moshës 30-39 vjeç – 19.4 për qind. Në grupmoshën 40-49 vjeç janë 17.9 për qind e të infektuarve të rinj, ndërsa në grupmoshën 50-59 vjeç – 17.8 për qind. Numri më i ulët është regjistruar te fëmijët nga 0 deri në 9 vjeç – 3.1 për qind dhe 10-19 vjeç 5.0 për qind. Nga rastet që hetohen në mënyrë epidemiologjike, 136 persona ose 15.7 për qind janë shtruar në spital, ndërsa te 277 persona ose në 32.2 për qind është regjistruar prania e komorbiditeteve. Nga numri i përgjithshëm i të infektuarve 38.1 për qind kishin kontakte me rast të konfirmuar të Kovid-19, ndërsa 21 persona (njëjtë me javën e kaluar) kanë pasur një histori udhëtimi jashtë vendit në 14 ditët e kaluara”, thonë nga Ministria e Shëndetësisë.

Momentalisht, numri i përgjithshëm i të infektuarve me Covid – 19 që nga fillimi i pandemisë është 11,202, numri i pacientëve të vdekur  505, numri i pacientëve të  shëruar  7,108 ndërsa, ndërsa  ka 3,589 raste aktive.

Lajme të ngjashme

Leave a Reply

Your email address will not be published. Required fields are marked *

Back to top button