Arrestime dhe përleshje në protestat kundër Netanyahut në Izrael
Me mijëra njerëz kanë demonstruar para rezidencës zyrtare të Netanyahut në Jerusalem dhe me qindra u mblodhën në një park në Tel Aviv, duke kërkuar dorëheqjen e Netanyahut dhe duke e kritikuar përgjigjen e tij ndaj krizës në shtet, transmeton Koha.net.
Për herë të parë që nga nisja e valës së protestave para disa jave, me qindra protestues u mblodhën edhe para shtëpisë private të Netanyahut në qytetin Caesarea, kur u përballën me forca të sigurisë.
Protestat po paraqesin sfidë të madhe për kryeministrin Netanyahu, ngase po kritikohet për humbjen e betejës me koronavirus dhe rënien e ekonomisë, por edhe për shkak akuzave për korrupsion për të cilat edhe po gjykohet.
Në një konferencë për shtyp javën e kaluar, e cila u përcoll me protesta, Netanyahu i adresoi demonstruesit, duke thënë: “Mos e zvarritni shtetin në anarki, dhunë dhe vandalizëm”.
Kritikët thonë se policia po përdorë dhunë për të shpërndarë protestuesit, duke përdorur topa uji e madje edhe duke shkaktuar lëndime tek njerëzit. Policia thotë se protestuesit të cilët injorojnë thirrjet për t’u shpërndarë largohen, në mënyrë që të kthehet rendi.
