Katër mijë policë për të detyruar qytetarët të respektojnë masat kundër virusit korona në Kosovë
Për mosrespektim të masës së vetizolimit, Policia e Kosovës pothuajse çdo ditë inicion lëndë për në gjykatë ndaj personave që janë pozitivë me COVID-19.
Vetëm gjatë javës së fundit është raportuar për 4 persona, të cilët ishin pozitivë dhe që nuk kanë respektuar masën e vetizolimit, raporton KOHA.
Për respektimin e masave janë angazhuar 4 mijë policë në tërë territorin e Kosovës.
“Jemi duke shfrytëzuar edhe Kodin Penal, që në raste të caktuara të shfrytëzojmë edhe atë në mënyrë që t’i bindim qytetarët t’i respektojnë masat parandaluese”, ka thënë Rashit Qalaj, drejtor i Policisë së Kosovës.
Kryeinspektori sanitar, Ibrahim Tërshnjaku, ka thënë se për katër ditë u gjobitën 387 persona dhe 29 biznese.
Përderisa nga PDK-ja, në seancën e Kuvendit, është kërkuar bashkërendim institucionesh dhe kontroll më i madh për personat të cilët nuk po e respektojnë masën e vetizolimit.
Megjithatë, është përmendur edhe mundësia e publikimit të të dhënave të këtyre personave në mënyrë që të ketë kontroll më të madh në menaxhimin e pandemisë.
Për këtë ka reaguar edhe Agjencia për Informim dhe Privatësi, duke thënë që kjo është në kundërshtim me Ligjin për mbrojtjen e të dhënave personale.
