Reagime: Fëmijët të mos keqpërdoren për fushatë politike
Këshillit shtetëror për parandalim të delikuencës së fëmijëve nëpërmjet një komunikate ka reaguar ndaj përfshirjes së fëmijëve në fushata politike. Nga ky këshill kanë thënë se përfshirja e fëmijëve (persona deri në 18 vjeç) në çfarëdo aktivitete lidhur me fushatën politike është e palejueshme dhe nuk është në interes të fëmijëve, në pajtueshmëri me Konventën për të Drejtat e Fëmijëve, transmeton Portalb.mk.
“Kujdesi për fëmijët duhet të realizohet përmes sigurimit të kushteve ligjore dhe institucionale për rritjen e tyre, zhvillimin dhe edukimin në mënyrë të duhur dhe kujdes për eliminimin e burimeve të rreziqeve. Gjithçka tjetër paraqet keqpërdorim të tyre dhe shkelje të të drejtave të fëmijëve”, thuhet në reagim.
Në lidhje me këtë kanë reaguar edhe nga Ambasada e Parë për Fëmijë në botë Megjashi, prej ku kanë thënë se keqpërdorimi dhe manipulimi i fëmijëve dhe gjërave në lidhje me fëmijët ditëve të fundit është gjithnjë e më i madh. Nga Megjashi kanë thënë se, nga fillimi i fushatës, kanë pranuar katër denoncime dhe informata për shkelje të të drejtave të fëmijëve apo manipulim me fëmijë. Ata kanë shprehur shqetësimin e tyre të thellë për porositë që u dërgohen fëmijëve përmes mënyrës së udhëheqjes së fushatave politike dhe spoteve politike.
