Rusia pranon se Assadi ka humbur kontrollin
Një zyrtar i lartë i Rusisë ka pranuar për herë të parë se presidenti i Sirisë, Bashar al-Assad, ka humbur kontrollin mbi vendin e tij dhe mund të përmbyset nga rebelët. Zëvendësministri i Jashtëm, Mikhail Bogdanov, ka thënë se Rusia po bën plane për evakuimin e mijëra shtetasve të saj në Siri.
Ai ka thënë se fitorja e rebelëve mund të ketë çmimin e mijëra jetëve të njerëzve.
Rusia është aleat i ngushtë i Sirisë dhe ka bërë thirrje për bisedime ndërmjet Qeverisë siriane dhe rebelëve, me qëllim zgjidhjen e konfliktit 20-muajsh.
Ajo, së bashku me Kinën, u kanë vënë veto rezolutave të Këshillit të Sigurimit të Kombeve të Bashkuara, të cilat do t’i bënin presion regjimit të Bashar al-Assadit për të ndërprerë goditjen e përgjakshme mbi kryengritjen.
Fuqitë perëndimore kanë bërë vazhdimisht thirrje për dorëheqjen e Assadit./Portalb