Mbi 4 milionë persona të infektuar me koronavirus në botë

Ka arritur në mbi katër milionë, numri i personave të infektuar me koronavirus në mbarë botën, sipas të dhënave të publikuara nga Universiteti Johns Hopkins, transmeton Portalb.mk.

Numri i vdekjeve nga sëmundja COVID-19 – që shkakton koronavirusi i ri – ndërkaq ka kaluar shifrën prej 279 mijë.

Shtetet e Bashkuara vazhdojnë të jenë shteti i goditur më së keqi nga koronavirusi me 1,3 milion raste të të infektuarve dhe afro 79 mijë të vdekur.

Ekspertët paralajmërojnë se numri i të të infektuarve mund të jetë më i lartë, për shkak të testimeve të pakta që kryhen në shumë shtete.

Në baza ditore, në disa vende ka nisur të bie numri i viktimave, përfshirë edhe në Spanjë, por ka shqetësime se lehtësimi i masave të izolimit mund të çojë deri te një “valë e dytë” e infektimeve.

Rastet e para me koronavirusin e ri u raportuan për herë të parë në Vuhan të Kinës, në fundin e vitit 2019. Që atëherë, sipas të dhënave të Universitetit Johns Hopkins, 187 shtete kanë raportuar për raste me koronavirus.