Spanjë, 213 vdekje të reja nga koronavirusi në 24 orët e fundit

Shumica e rajoneve të Spanjës kanë shprehur gatishmërinë për lehtësimin e masave të bllokimit të ndërmarra për parandalimin e përhapjes së koronavirusit të ri (COVID-19) pasi Spanja raportoi 213 vdekje të tjera dhe 754 raste të reja me COVID-19 të enjten, raporton Anadolu Agency (AA). 

Ministria e Shëndetësisë tha se 26.070 njerëz kanë humbur jetën nga virusi COVID-19, 221.447 persona janë infektuar, ndërsa 121.014 njerëz janë shtruar në spital.

Shkalla e vdekjeve të reja, infeksioneve dhe shtrimeve në spital është ulur ndjeshëm që nga kulmi rreth një muaj më parë.

Qeveritë lokale në të gjithë vendin tani kanë paraqitur raporte tek qeveria qendrore në lidhje me gatishmërinë e tyre për të lehtësuar më tej masat e bllokimit. Të gjitha rajonet, me përjashtim të pjesëve të Katalonjës, përfshirë atë të Barcelonës, dhe Castile dhe León, thonë se janë të gatshme për zbutjen e masave.

“Ne i plotësojmë kërkesat shëndetësore, nuk mund të presim”, tha Ignacio Aguado, nënkryetar i rajonit të Madridit, zona më e goditur e Spanjës, për Televizionin Spanjoll. “Ne duhet të mësohemi të jetojmë me COVID-19”, tha ai.

Të enjten, Madridi regjistroi 128 raste të shtrimit në spital, 86 infeksione të reja dhe 38 vdekje të tjera.

Ministria e Shëndetësisë aktualisht është duke shikuar kriteret në lidhje me aftësinë e kujdesit shëndetësor krahinor dhe situatat epidemiologjike për të vendosur në cilat zona mund të lëvizin më tej.

Rajonet që u jepet drita jeshile për të përparuar do të mund të hapin tarracat e restoranteve dhe dyqanet me kapacitet të kufizuar të hënën. Grupe me deri në 10 persona gjithashtu do të jenë në gjendje të takohen brenda shtëpive ose jashtë.

Katër ishuj spanjollë kanë përparuar tashmë në fazën tjetër.