Në Kanada u protestua kundër masave kufizuese ndaj COVID-19
Në Vankuver të Kanadasë janë mbajtur protesta kundër masave kufizuese të marra në kuadër të luftës kundër pandemisë së koronavirusit të ri (COVID-19), njofton Portalb.mk.
Qytetarët mbajtën fillimisht protesta kundër masave të cilat kanë të bëjnë me ndalesën e lëvizjes dhe tubimit.
Demonstruesit mbanin pankarta me mbishkrimet “Ndalesa e lëvizjes nënkupton kolaps ekonomik”, “Masat kufizuese dëmtojnë shoqërinë”, “Hiqni ndalesat” dhe “Izolimi i të sëmurëve është karantinë, kurse izolimi i njerëzve të shëndoshë tirani”.
Protestë e ngjashme është mbajtur edhe në Ontario dhe në SHBA, ku qytetarët kërkuan heqjen e masave ndaluese si distanca në shoqëri, karantina dhe mbyllja e kompanive.
Disa demonstrues e quajtën virusin mashtrim, ndërsa disa të tjerë u ankuan se masat e ndërmarra janë shumë rigoroze.
Deri më tani në Kanada janë regjistruar 46.895 raste me koroanvirus, me 2.560 të vdekur dhe 17.334 të shëruar.
