Në Tetovë me rrethinë ka 57 të infektuar, prej nesër vlejnë masat e reja
Sot nga gjithsej 18 raste të reja të evidentuara me virusin korona në RMV, dy prej tyre janë nga Tetova me rrethinë, kështu numri i të infektuarve në këtë rajon ka arritur në 57 duke bërë që Tetova me rrethinë të jetë në vendin e 5 për nga numri i të infektuarve në shtet, njofton Portalb.mk.
Në Tetovë me rrethinë numri i të infektuarve me virusin korona pëson rritje të ngadalshme, edhe atë çdo ditë rezultojnë nga dy apo tre persona të infektuar, kështu duke bërë të mundur edhe për sistemin shëndetësor të përballoje me sukses trajtimin e pacientëve.
Në këtë periudhë, numri i personave të vendosur në karantinë shtetërore në rajonin e Tetovës dhe Gostivarit, është 210, edhe atë 62 në Tetovë dhe 148 në Gostivar ndërsa numri i personave evidentuar në vetë-izolim ndaj të cilëve pjesëtarët e policisë kanë kryer kontroll për mbikëqyrje është 253, Tetovë 180 dhe Gostivar 73, ndërsa personat që janë në mbikëqyrje me vendim të Inspektoratit Shtetërorë Sanitar është 328, Tetovë 301 ndërsa Gostivar 27.
Masat e veçanta për Tetovën do të vlejnë prej nesër
Qeveria e RMV-së në mbledhjen e 43-të të zhvilluar online, shqyrtoi dhe miratoi propozimet e shtabit të krizës për masat që duhet të merren në të ardhmen për t’u përballur me pandeminë dhe pasojat e saj. Për qytetet: Tetovë, Kumanovë dhe Prilep u vendos që të merren masa të veçanta si rezultat i shtimit të numrit të rasteve në këto qytete.
Një pjesë e donacioneve nga pajisjet mbrojtëse që Maqedonia e Veriut i ka pranuar t’u jepen komunës së Tetovës, Kumanovës dhe Prilepit.
- U vendos që të ndërpritet transporti publik dhe privat, më saktë të gjitha hyrjet dhe daljet në Tetovë nga komunat e Pollogut dhe të Shkupit (kjo ndalesë vlen vetëm për transportin e organizuar me autobusë dhe furgonë).
- Dekret për mbajtje obligative të maskave pas daljes nga shtëpia (në rrugë, hapësira publike, në punë, në dyqane) në komunat: Tetovë, Kumanovë dhe Prilep. Mund të përdoret maskë medicinale, por edhe maska prej materialeve tjera, shami ose shall. Me rëndësi është të mbulohen hunda dhe goja.
- Do sillet Dekret i veçantë për dënime të detyrueshme për shkeljet e rekomandimeve në vijim: grupim të më shumë se 2 personave dhe mosmbajtja e distancës. Policia duhet të sigurojë fotografi të shkeljes (për veprim të mëtutjeshëm). Dënimet do të lëvizin ndërmjet 1000 dhe 1500 denarësh.
- Dekret që bankat t’i respektojnë të njëjtat rregulla para dhe brenda hapësirave të tyre njësoj si marketet.
- Dekret për detyrim për pajisje mbrojtëse për punëtorët në shitore, barnatore dhe markete.
Definimi i numrit të njerëzve në 100m2. - Mënyra speciale e pagesës së subvencioneve dhe pensioneve në 2 javët e ardhshme (tanimë ka protokoll të propozuar për subvencionet).
- Dekret për të gjitha TV/Radio për sigurimin e 5 minutave kohë për transmetim të mesazheve informative të përgatitura nga Ministria e Shëndetësisë dhe Qeveria lidhur me COVID19.
- Ndërmarrjet të cilat shesin pajisje mbrojtëse duhet të ruajnë përqindje të caktuar të maskave për nevojat e institucioneve shtetërore. Qeveria e obligoi Ministrinë e Shëndetësisë të përgatisë dhe të paraqesë për seancën e ardhshme dekret me fuqi ligji që do të rregullojë juridikisht mënyrën e zbatimit, përdorimit, pajisjet e nevojshme mbrojtëse si dhe për të rregulluar çështjen e shumës minimale të detyrueshme (rezervës) që duhet të kenë prodhuesit e maskave për nevojat e institucioneve shtetërore.
Ndryshe, sot janë evidentuar edhe 18 raste të reja me virusin korona në RMV, kështu numri i përgjithshëm i të infektuarve ka arritur në 1225 kurse jetë kanë ndërruar gjithsej 54 persona, të shëruar në shtet ka 200 persona kurse 971 raste janë aktive.
