Gjermania publikoi lehtësimin e masave
Kancelarja gjermane Angela Merkel tha të mërkurën se rregullat e distancimit social për të frenuar përhapjen e coronavirus do të qëndrojnë në fuqi të paktën deri më 3 maj, por disa dyqane do të mund të hapen duke filluar nga java e ardhshme, transmeton EN.
Pas bisedimeve me krerët e 16 landeve, Merkel iu tha gazetarëve se masat e marra kishin sjellë një “sukses të ndërmjetëm por ende të brishtë” në luftën kundër pandemisë.
“Ajo që kemi arritur është një sukses i ndërmjetëm, as më pak e as më shumë. Dhe e theksoj që është ende një sukses i brishtë, ashtu siç e përmendi sot edhe z. Wieler nga Instituti Rober Koch. Faktorët që përcaktojnë këtë po shkojnë në rrugën e duhur por nuk kemi shumë vend për manovra. Duhet të qëndrojmë të fokusuar dhe të vazhdojmë përpara”.
Merkel shtoi se qeveria i këshillon qytetarët që të mbajnë maska kur të jenë duke blerë dhe në ambientet e transportit publik. Më tej kancelarja konfirmoi se shkollat do të hapen gradualisht duke filluar nga data 4 maj.
“Do të fillojmë ngadalë me hapjen e shkollave, hap pas hapi pas 4 majit. Duhet të jetë në grupe të vogla, duhet të ketë një plan për autobusët e shkollave, një plan për orën e pushimit, kështu që do të jetë një përpjekje e madhe logjistike që të do të kërkojë përgatitje intensive”.
“Kemi arritur diçka që nuk ishte e sigurt në fillim, domethënë që mjekët, infermierët dhe të gjithë ata që punojnë në sektorin e shëndetit të mos mbingarkohen. Ata po bëjnë një punë jashtëzakonshme dhe po punojnë nën presion të madh, por kemi bërë të mundur që sistemi ynë shëndetësor të vazhdojë”.