Mesazhi i rremë, kinse i dërguar nga mikrobiologu Raka, shpërndahet gjithandej në Kosovë
Qytetarët vazhdojnë të bien pre e dezinformatave dhe duke shpërndarë një të pavërtetë, po kontribuojnë pavetëdijshëm në krijimin e panikut te publiku. Dezinformata që ka qarkulluar shumë nëpër profile e faqe të ndryshme në Facebook në Kosovë është një mesazh, i dërguar gjoja nga mikrobiologu Lul Raka. Mesazhi, i cili ndër të tjera thotë se do të ndodh një katastrofë e madhe, si pasojë e koronavirusit, është shpërndarë në Facebook, Viber, Instagram e WhatsApp, njofton Portalb.mk.
Së fundi, reagoi edhe vetë mikrobiologu Lul Raka, duke treguar se nuk është ai që e ka thënë atë dhe se në mesazhet e tij asnjëherë nuk e ka përmendur fjalën ‘katastrofë’, megjithatë dezinformata është bërë virale. Nëse kërkoni në Facebook me fjalët “Dr. Lul Raka me një mesazh”, do të dalin shumë rezultate, qytetarë të ndryshëm që e kanë shpërndarë këtë dezinformatë.
Qytetarët nuk duhet të besojnë çdo informacion që lexojnë dhe për t’a mbrojtur veten nga çfarëdo dezinformate duhet thjesht të mendojnë dhe të gjykojnë mbi përmbajtjen mediale të cilës i ekspozohen, para se ta besojnë dhe ta shpërndajnë atë. Në këtë kohë kur ka tejngopje informative, është shumë e rëndësishme të përzgjedhen me kujdes burimet e informacionet dhe zgjedhja më e mirë është kur informoheni vetëm nga mediet serioze dhe institucionet shtetërore.
Autor: Dren Gërguri